ബിന്ദു അമ്മിണിക്ക്​ നേരെ അതിക്രൂര ആക്രമണം; ആക്രമിച്ചത്​ സംഘപരിവാറുകാരനാണെന്ന് ആരോപണം

കോഴിക്കോട്​: ആക്ടിവിസ്റ്റും കോഴിക്കോട്​ ഗവ. ലോ കോളജ്​ ഗസ്റ്റ്​ അധ്യാപികയുമായ ബിന്ദു അമ്മിണിക്കെതിരെ ക്രുരമായ ആക്രമണം. കോഴിക്കോട്​ നോർത്ത്​ ബീച്ചിൽവെച്ച്​ ബുധനാഴ്ച വൈകീട്ടാണ്​ സംഭവം. സംഘപരിവാർ പ്രവർത്തകനാണ്​ ആക്രമിച്ചതെന്ന്​ ബിന്ദു അമ്മിണി പറഞ്ഞു. കേസുമായി ബന്ധ​പ്പെട്ട സത്യവാങ്​മൂലത്തിൽ ഒപ്പിടാൻ വെള്ളിമാട്​കുന്നിലെ ലോ കോളജിൽ നിന്ന്​ കൊ​ണ്ടോട്ടി സ്വദേശികളായ സ്ത്രീകൾക്കൊപ്പം കാറിൽ ബീച്ചിന്​ സമീപമെത്തിയപ്പോഴാണ്​​ സംഭവം.

അഭിഭാഷകൻ സ്ഥലത്തില്ലാത്തതിനാൽ ചായ കുടിക്കാൻ പുറത്തിറങ്ങിയപ്പോഴാണ്​ കുറച്ചാളുകൾ ഇവരുടെ കാർ തടഞ്ഞത്​. കൂടുതൽ പ്രശ്​നങ്ങളുണ്ടാകരുതെന്ന്​ കരുതി കൂടെയു​ണ്ടായിരുന്ന സ്ത്രീകളെ ബിന്ദു അമ്മിണി പറഞ്ഞയച്ചു. പിന്നീട്​ അക്രമികൾ ബിന്ദുവിന്​ നേരെ തിരിഞ്ഞു. ഒരാൾ അതിക്രൂരമായി മർദിക്കുകയായിരുന്നു. മർദനത്തിനിടെ മുണ്ട്​ അഴിഞ്ഞുപോയിട്ടും അക്രമി പിന്മാറിയില്ല. ഫുട്​പാത്തിന്​ സമിപത്തേക്ക്​ തള്ളിയിട്ടതോടെ ബിന്ദു അമ്മണിയുടെ തല കോൺക്രീറ്റ്​ സ്ലാബിനിടിച്ചു. കഴുത്തിൽ പിടിച്ച്​ ഞെരിക്കുകയും ചെയ്തു.

ഇൗ സംഭവങ്ങൾ സമീപത്തുള്ള ഒരാൾ മൊബൈലിൽ പകർത്തിയിരുന്നു. പിന്നീട്​ വെള്ളയിൽ പൊലീസിൽ പരാതി നൽകി. ഒരാൾക്കെതിരെ കേസെടുത്തിട്ടുണ്ട്​. അക്രമിക്ക്​ പരിക്കില്ലെങ്കിലും ആശുപത്രിയിൽ ചികിത്സ തേടിയിട്ടുണ്ട്​. സംഭവത്തിന്​ ശേഷം താൻ വീട്ടിലേക്ക്​ തിരിച്ചുപോവുകയാണെന്ന്​ ബിന്ദു അമ്മിണി 'മാധ്യമ'ത്തോട്​ പറഞ്ഞു.

ശബരിമലയിൽ ദർശനം നടത്തിയതിന്​ ശേഷം നിരവധി തവണ ബിന്ദു അമ്മിണിക്കെതിരെ സംഘപരിവാറിന്‍റെ ആക്രമണമുണ്ടായിരുന്നു. കൊച്ചിയിൽ വെച്ച്​ ഒരാൾ മുളകുവെള്ളം കണ്ണിലൊഴിച്ചിരുന്നു. ഒരു മാസം മുമ്പ്​ കൊയിലാണ്ടിയിൽ ഓ​ട്ടോ മനപൂർവം ഇടിപ്പിച്ചതിനെ തുടർന്ന്​ മൂക്കിന്​ പരിക്കേറ്റിരുന്നു. നിരന്തരമായ ആക്രമണമുണ്ടായിട്ടും പൊലീസ്​ കാര്യമായ നടപടിയെടുക്കുന്നില്ലെന്നും ബിന്ദു അമ്മിണിക്ക്​ പരാതിയുണ്ട്​.