വീട്ടമ്മയെയും മകനെയും ആക്രമിച്ച സഹോദരങ്ങൾ അറസ്റ്റിൽ

അടിമാലി: രാത്രിയിൽ വീട്ടിൽ കയറി വീട്ടമ്മയെയും മകനെയും ആക്രമിക്കുകയും വീട് അടിച്ചുതകർക്കുകയും ചെയ്ത സഹോദരങ്ങൾ അറസ്റ്റിൽ. കൈലാസം സ്വദേശികളായ മുളകുപാറയിൽ മുരുകേശൻ (32), വിഷ്ണു (28) എന്നിവരെയാണ് ഉടുമ്പഞ്ചോല പൊലീസ് അറസ്റ്റ് ചെയ്തത്. വ്യാഴാഴ്ച പുലർച്ച ഒരു മണിയോടെയാണ് സംഭവം.

കൈലാസം സ്വദേശി കല്ലാനിക്കൽ സേനന്‍റെ വീട്ടിൽ രാത്രി അതിക്രമിച്ചു കയറി ഭാര്യയെയും മകൻ അഖിലിനെയും ദേഹോപദ്രവം ഏൽപിക്കുകയും വീട് അടിച്ചുതകർക്കുകയുമായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ഉടുമ്പഞ്ചോല എസ്.ഐ അബ്‌ദുൽ ഖനി, എ.എസ്.ഐ ബെന്നി, സി.പി.ഒ ടോണി എന്നിവരാണ് പ്രതികളെ അറസ്റ്റ് ചെയ്തത്.