കൈക്കൂലി വാങ്ങിയ വാണിജ്യ നികുതി ഇൻറലിജൻസ്​ ഒാഫിസറെ​ ​ൈ​കയോടെ പിടികൂടി

മലപ്പുറം: കെട്ടിട ഉടമയിൽനിന്ന്​ കൈക്കൂലി വാങ്ങിയ കേസിൽ മലപ്പുറം വാണിജ്യ നികുതി ഇൻറലിജൻസ്​ ഒാഫിസർ, ഇൻറലിജൻസ്​ ഇൻസ്​പെക്​ടർ എന്നിവരെ വിജിലൻസ്​ കൈയോടെ പിടികൂടി. മലപ്പുറം സിവിൽ സ്​റ്റേഷനിലെ വാണിജ്യ നികുതി ഇൻറലിജൻസ്​ ഒാഫിസിൽ വെള്ളിയാഴ്​ച വൈകീട്ട്​ നാലോടെയാണ്​​ പരിശോധന നടന്നത്​. നോർത്തേൺ മേഖല വിജിലൻസ്​ എസ്​.പി ഉമ ബെഹ്​റയ​ുടെ നിർദേശപ്രകാരം കോഴിക്കോട്ടു നിന്നെത്തിയ സംഘമാണ്​ ഇൻറലിജൻസ്​ ഒാഫിസർ മോഹനൻ, ഇൻസ്​പെക്ടർ ഫൈസൽ ഇസ്​ഹാഖ്​ എന്നിവരെ പിടികൂടിയത്​. ഇവരിൽനിന്ന്​ 60,000 രൂപയു​ം കണ്ടെടുത്തു. 

​മലപ്പുറം ചെനക്കലങ്ങാടി സ്വദേശി പൊറോളി മുഹമ്മദലിയുടെ പരാതിയിലാണ്​ നടപടി. ചേളാരിയിൽ ഇദ്ദേഹം നിർമിച്ച കെട്ടിടത്തി​ൽ പരിശോധന നടത്തിയ വാണിജ്യ വകുപ്പ്​ ഉദ്യോഗസ്​ഥർ എം സാൻഡിനും മെറ്റലിനും ബിൽ ഇല്ലാത്തത്​ കണ്ടെത്തിയിരുന്നു. മൂന്ന്​ ലക്ഷം രൂപ നികുതിയിനത്തിൽ അടക്കണമെന്നും ആവശ്യപ്പെട്ടു. പിന്നീട്​ 60,000 രൂപ കൈക്കൂലിയായി നൽകുകയാണെങ്കിൽ നികുതി തുക 1,58,000 രൂപയാക്കി ചുരുക്കിത്തരാമെന്നും അറിയിച്ചു. ഇതോടെ മുഹമ്മദലി വിജിലൻസിൽ പരാതി നൽകുകയായിരുന്നു. 

ഉദ്യോഗസ്​ഥർ ആവശ്യപ്പെട്ട പ്രകാരം പണം നൽകാൻ മലപ്പുറം സിവിൽ സ്​റ്റേഷനിലെ വാണിജ്യ നികുതി ഇൻറലിജൻസ്​ ഒാഫിസിൽ എത്താൻ വിജിലൻസ്​ മുഹമ്മദലിക്ക്​ നിർദേശം നൽകി. പറഞ്ഞതു പ്രകാരം ഒാഫിസിലെത്തിയ മുഹമ്മദലി മോഹനന്​ കൈക്കൂലി നൽകി പുറത്തിറങ്ങിയ ഉടൻ സമീപത്തുണ്ടായിരുന്ന ഉദ്യോഗസ്​ഥർ അകത്തുകടന്ന്​ പണം പിടികൂടുകയായിരുന്നു. മോഹനനിൽനിന്ന്​ 50,000 രൂപയും ഫൈസലി​​െൻറ കൈയിൽനിന്ന്​ 10,000 രൂപയുമാണ്​ പിടികൂടിയത്​. 

പ്രതികളെ വെള്ളിയാഴ്​ച രാത്രിയോടെ കോഴിക്കോട്​ ഇൻറലിജൻസ്​ ജഡ്​ജിക്ക്​ മുമ്പാകെ ഹാജരാക്കുമെന്ന്​ വിജിലൻസ്​ സംഘം അറിയിച്ചു. വിജിലൻസ്​ നോ​ർ​േത്തൺ മേഖല ഡിവൈ.എസ്​.പി അശ്വകുമാർ, സി.​െഎമാരായ ചന്ദ്രമോഹൻ, പ്രവീൺ കുമാർ, എസ്​.​െഎ പ്രേമാനന്ദൻ, എ.എസ്​.​െഎ ശ്രീകുമാർ, ഫിറോസ്​, സി.പി.ഒമാരായ ഷാജി, വിനോദ്​ കുമാർ എന്നിവരടങ്ങുന്ന സംഘമാണ്​ പ്രതികളെ പിടികൂടിയത്​.