മുല്ലപ്പെരിയാര്‍ ഡാമിന്​ ബോംബ് ഭീഷണി: പിടിയിലായത്​ മാനസിക വൈകല്യമുള്ളയാൾ

തൃശൂര്‍: മുല്ലപ്പെരിയാര്‍ ഡാം ബോംബ് ​െവച്ച് തകര്‍ക്കുമെന്ന് ഭീഷണിപ്പെടുത്തിയ കേസിലെ പ്രതിയെ കണ്ടെത്തി. മാനസിക വൈകല്യമുള്ള പ്രതിയെ ജില്ലയിലെ മാനസികാരോഗ്യ കേന്ദ്രത്തില്‍ പ്രവേശിപ്പിച്ചു. പൊലീസ് ആസ്ഥാനത്തെ കണ്‍ട്രോള്‍ റൂമിലേക്കാണ്​ ഭീഷണി ഫോണ്‍ സന്ദേശം എത്തിയത്. ഇതേതുടര്‍ന്ന് മുല്ലപ്പെരിയാര്‍ അണക്കെട്ടില്‍ ബോംബ്, ഡോഗ് സ്‌ക്വാഡുകള്‍ പരിശോധന നടത്തിയിരുന്നു. തുടരന്വേഷണത്തിലാണ് ഭീഷണി സന്ദേശം തൃശൂരില്‍ നിന്നാണെന്ന് കണ്ടെത്തിയത്. രാത്രി വൈകാതെ തന്നെ പ്രതിയെ പിടികൂടുകയായിരുന്നു.

പെരിയാർ കടുവ സങ്കേതത്തിന്​ നടുവിലുള്ള മുല്ലപ്പെരിയാർ അണക്കെട്ട് ബോംബു​െവച്ച് തകർക്കുമെന്നായിരുന്നു ഭീഷണി. സംസ്ഥാന പൊലീസ് ആസ്ഥാനത്തേക്കാണ് വെള്ളിയാഴ്ച വൈകീട്ട് 5.15ഓടെ ഭീഷണി സന്ദേശം എത്തിയത്. തുടർന്ന് അണക്കെട്ടിൽ പരിശോധന നടത്താൻ പൊലീസ് ആസ്ഥാനത്തുനിന്ന്​ നിർദേശം നൽകി.

ഭീഷണിയുടെ പശ്ചാത്തലത്തിൽ അണക്കെട്ടി​െൻറ സുരക്ഷ ചുമതലയുള്ള ഡിവൈ.എസ്​.പി നന്ദനൻ പിള്ളയുടെ നേതൃത്വത്തിൽ രണ്ട് ഇൻസ്പെക്ടർമാർ ഉൾ​െപ്പടെ 30ൽഅധികം പൊലീസ് ഉദ്യോഗസ്ഥർ അണക്കെട്ട്, ബേബി ഡാം, സ്പിൽവേ എന്നിവിടങ്ങളിലും പരിസര പ്രദേശങ്ങളിലും വിശദ പരിശോധന നടത്തി. എന്നാൽ, ഒന്നും കണ്ടെത്താനായില്ല.

അണക്കെട്ടിൽ നിലവിൽ 128.70 അടി ജലമാണുള്ളത്. മേൽനോട്ടത്തിന്​ തമിഴ്നാട് പൊതുമരാമത്ത് വകുപ്പിലെ രണ്ട് അസി.എൻജിനീയർമാർ ഉൾ​െപ്പടെ 12ഓളം ജീവനക്കാരും തൊഴിലാളികളും അണക്കെട്ടിലുണ്ട്. ആധാർ കാർഡ് ഉൾ​െപ്പടെ തിരിച്ചറിയൽ രേഖകൾ പരിശോധിച്ചാണ് ഇവരെ അണക്കെട്ടിൽ പ്രവേശിപ്പിക്കുന്നത്.

തേക്കടിയിൽനിന്ന്​ ബോട്ടിലും വള്ളക്കടവിലെ വനം വകുപ്പ് ചെക്ക്​ പോസ്​റ്റിൽനിന്ന്​ ജീപ്പിലുമാണ് കാട്ടിനുള്ളിലെ അണക്കെട്ടിൽ എത്താനാവുക. അണക്കെട്ടിലെ ഉദ്യോഗസ്ഥർ, പൊലീസ് എന്നിവർക്ക് മാത്രമാണ് അനുമതിയുള്ളത്. ഭീഷണി ഉയർന്ന സാഹചര്യത്തിൽ സുരക്ഷ കൂടുതൽ കർശനമാക്കിയിരുന്നു.