ബി.ജെ.പി വർഗീയ പാർട്ടിയല്ല; രാജ്യസ്​നേഹികളുടെ പാർട്ടി -ഇ. ശ്രീധരൻ

​കൊച്ചി: പ്രധാനമന്ത്രി നരേന്ദ്ര മോദിയോടുള്ള ആദരവ് കൊണ്ട്​ മാത്രമല്ല, ബി.ജെ.പിയുടെ മൂല്യങ്ങൾ കണ്ടാണ്​ താൻ പാർട്ടിയിൽ ചേർന്നതെന്ന്​ മെട്രോമാൻ ഡോ. ഇ. ശ്രീധരൻ. താൻ ബി.ജെ.പിയെ ഒരു സാമുദായിക പാർട്ടിയായിട്ടല്ല, മറിച്ച് രാജ്യസ്‌നേഹികളുടെ പാർട്ടിയായിട്ടാണ് കാണുന്നതെന്നും അദ്ദേഹം എൻ.ഡി.ടി.വിക്ക്​ നൽകിയ പ്രത്യേക അഭിമുഖത്തിൽ പറഞ്ഞു.

''ബി.ജെ.പിയെ സാമുദായിക പാർട്ടിയായി ചിത്രീകരിക്കാനുള്ള ശ്രമം രാജ്യത്ത്​ നടക്കുന്നുണ്ട്​. ബി.ജെ.പി ഒരിക്കലും ഒരു വർഗീയ കക്ഷിയല്ല എന്നാണ്​ എന്‍റെ അഭിപ്രായം. ബി.ജെ.പിക്കാരുമായി എനിക്ക്​ അടുത്ത ബന്ധമുള്ളത്​ കൊണ്ട്​ മാത്രം പറയുന്നതല്ല ഇത്​. ഇത് രാജ്യസ്‌നേഹികളുടെ പാർട്ടിയാണ്. എല്ലാ കക്ഷികളെയും സമുദായങ്ങളെയും ഒരുപോലെ ഉൾക്കൊള്ളുന്നവരാണ്​. അതാണ് മോദി സർക്കാരിന്‍റെ നിലപാട്​. അദ്ദേഹം സംസാരിക്കുന്ന രീതി നോക്കൂ, ഒരു മതത്തെയും ആക്രമിക്കുന്നത് ഞാൻ ഒരിക്കലും കണ്ടിട്ടില്ല. ബി.ജെ.പിക്കെതിരെ മതപരമായ പക്ഷപാതിത്വം ആരോപിക്കുന്നത്​ തികച്ചും അനീതിയാണ്​'' -ശ്രീധരൻ പറഞ്ഞു.

ലവ്​ജിഹാദ്​, ഗോവധ നിരോധനം തുടങ്ങിയ കാര്യങ്ങളിൽ ബി.ജെ.പി നയം പൂർണമായും അംഗീകരിക്കുന്നു​െവന്നും അദ്ദേഹം പറഞ്ഞു. ''ഞാൻ ഉറച്ച സസ്യാഹാരിയാണ്​. മുട്ടപോലും കഴിക്കാറില്ല. അത്​​െകാണ്ട്​ തന്നെ ആരെങ്കിലും ഇറച്ചി കഴിക്കുന്നത്​ തനിക്ക്​ ഇഷ്​ടവുമല്ല. ലവ്​ ജിഹാദ്​ ഇവിടെ യാഥാർഥ്യമാണ്​. എത്ര ഹിന്ദുക്കളാണ്​ കല്യാണത്തിന്‍റെ പേരിൽ ചതിയിൽപെട്ടത്​. ഹിന്ദുക്കൾ മാത്രമല്ല, മുസ്​ലിം, ക്രിസ്ത്യൻ പെൺകുട്ടികളും വിവാഹത്തിന്‍റെ പേരിൽ വഞ്ചിക്കപ്പെടുന്നുണ്ട്​. ഈ സാഹചര്യത്തിൽ ലവ്​ ജിഹാദിനെ ഞാൻ ശക്​തമായി എതിർക്കും'' -ശ്രീധരൻ പറഞ്ഞു.

ഇതുവരെ ജോലി സംബന്ധമായ തിരക്കുകളലായിരുന്നുവെന്നും ഇപ്പോൾ ഉത്തരവാദിത്തങ്ങൾ എല്ലാം തീർന്നതിനാൽ സമൂഹത്തിന്,​ പ്രത്യേകിച്ച് കേരളത്തിന്​ എന്തെങ്കിലും ചെയ്യാൻ ആഗ്രഹിക്കുന്നത്​ കൊണ്ടാണ്​ 88ാമത്തെ വയസ്സിൽ രാഷ്​ട്രീയത്തിൽ പ്രവേശിച്ചതെന്നും അദ്ദേഹം പറഞ്ഞു.

''എൽ.ഡി.എഫും യു.ഡി.എഫും മാറിമാറി ഭരിച്ചിട്ടും കേരളത്തിൽ വികസന​െമാന്നും കൊണ്ടുവന്നിട്ടി​ല്ല. ജനങ്ങളുടെ ജീവിതനിലവാരം ഉയർത്താനും കഴിഞ്ഞിട്ടില്ല. കഴിഞ്ഞ 20 വർഷത്തിനിടെ ഒരു വ്യവസായം പോലും കേരളത്തിൽ വന്നിട്ടില്ല. സംസ്​ഥാന സർക്കാർ കേന്ദ്രവുമായി ഏറ്റുമുട്ടലിന്‍റെ പാതയാണ്​ എപ്പോഴും സ്വീകരിക്കുന്നത്​. ഇത്​ കേന്ദ്രത്തിൽ നിന്ന് കൂടുതൽ സഹകരണവും സഹായവും ലഭിക്കുമെന്ന പ്രതീക്ഷ ഇല്ലാതാക്കുന്നു.

കേരളത്തിൽ ഒരു എം‌.എൽ.‌എ മാത്രമേയുള്ളൂ എന്നത് വസ്​തുതയാണെങ്കിലും ബി.ജെ.പിയുടെ പ്രതിച്ഛായയും പ്രചാരണവും ഉയർത്തണമെന്നാണ്​ എന്‍റെ ആഗ്രഹം. കാരണം, ബി.​െജ.പിക്കാർക്ക്​ ഉയർന്ന നിലവാരമുണ്ട്. അതിലുള്ളവർ സത്യസന്ധരാണ്​. അവർ കഠിനാധ്വാനികളാണ്. എല്ലാറ്റിനുമുപരിയായി രാജ്യസ്‌നേഹികളാണ്. അതാണ് എന്നെ ബി.ജെ.പിയിലേക്ക് ആകർഷിക്കുന്നത്.

പ്രധാനമന്ത്രി മോദിയുമായും മുൻ പ്രധാനമന്ത്രി വാജ്‌പേയിയുമായും അടുത്തബന്ധമുണ്ടായിരുന്നു. പരമ്പരാഗതമായി രാഷ്​ട്രീയക്കാർ തെരഞ്ഞെടുപ്പിനെ നേരിടുന്നത്​ പോലെയല്ല താൻ ചെയ്യുകയെന്നും ശബ്​ദകോലാഹലമില്ലാതെ ഓരോ വോട്ടർമാരുടെയും ഹൃദയത്തിൽ എത്താനാണ്​ ആഗ്രഹമെന്നും അദ്ദേഹം പറഞ്ഞു.