വ്യാജ രസീത് വിവാദം; സി.പി.എം–മാധ്യമഗൂഢാലോചനയെന്ന് ബി.ജെ.പി

വടകര: ബി.ജെ.പി ദേശീയ കൗൺസിൽ മീറ്റിങ്ങി​െൻറ ഭാഗമായി നടന്ന ഫണ്ട് പിരിവിന് വ്യാജ രസീത് ഉപയോഗിച്ചെന്ന ആരോപണത്തിനു പിന്നിൽ സി.പി.എം-മാധ്യമ ഗൂഢാലോചനയാണുള്ളതെന്ന് സംസ്​ഥാന സെക്രട്ടറി വി.കെ. സജീവൻ വാർത്തസമ്മേളനത്തിൽ ആരോപിച്ചു. ഇതേ കുറിച്ച് പാർട്ടിതലത്തിൽ അന്വേഷണം ആരംഭിച്ചിരിക്കുകയാണ്. പാർട്ടിക്കെതിരെ തുടർച്ചയായി ഉണ്ടായിക്കൊണ്ടിരിക്കുന്ന വാർത്തകളേയും ആരോപണങ്ങളേയും രാഷ്​ട്രീയപരമായും നിയമപരമായും നേരിടും. വ്യാജ രസീത്​ വിവാദം നാഥനില്ലാത്ത ആരോപണം മാത്രമാണ്. പാർട്ടി സംസ്​ഥാന നേതൃത്വം അച്ചടിച്ച് വിതരണം ചെയ്തതും നേതാക്കൾ പിരിവ് നടത്തിയതുമായ രസീത് വ്യാജമാണെന്ന് പ്രചരിപ്പിക്കുന്നതിന് പിന്നിൽ പാർട്ടിയെ ജനമധ്യത്തിൽ താറടിക്കാനുള്ള ശ്രമമാണ്. 

ചെരണ്ടത്തൂർ എം.എച്ച്.ഇ.എസ്​ കോളജ്, കുറ്റ്യാടി ശ്രീ ഗ്യാസ്​ ഏജൻസി എന്നിവിടങ്ങളിൽനിന്ന്​ പണപ്പിരിവ് നടത്തിയ രസീത് വ്യാജമാണോ എന്ന് പരിശോധിക്കാൻ അന്വേഷണം ആരംഭിച്ചിട്ടുണ്ട്. അന്വേഷണത്തിൽ കുറ്റക്കാരെന്ന് കണ്ടാൽ നടപടി സ്വീകരിക്കും. എം.എച്ച്.ഇ.എസ്​ കോളജ് അധ്യാപകനും ബി.ജെ.പി മയ്യന്നൂർ ബൂത്ത് പ്രസിഡൻറുമായ ശശികുമാറിനെ മർദിച്ചെന്നത് കള്ളക്കഥയാണ്. 
രസീത് ചോർന്നതിനെപറ്റി അന്വേഷിക്കാനാണ് പാർട്ടി നേതാക്കൾ കോളജിൽ എത്തിയത്. കോളജ് അധികൃതരിൽനിന്ന്​ ലഭിച്ച വിശദീകരണം സംസ്​ഥാന കമ്മിറ്റിക്ക്​ കൈമാറിയിരിക്കുകയാണ്. 
ഇത്തരം ആരോപണങ്ങളുടെ മറപിടിച്ചുകൊണ്ട് സി.പി.എം വ്യക്തിഹത്യ നടത്തുന്ന രീതിയിലുള്ള പ്രചാരണത്തിന് ശ്രമിക്കുകയാണെന്നും സജീവൻ കുറ്റപ്പെടുത്തി.
 എന്നാൽ, കുറ്റ്യാടി മണ്ഡലത്തിലെ നേതാക്കന്മാർക്കെതിരെ പ്രവർത്തകരിൽ ഒരു വിഭാഗം സംശയം പ്രകടിപ്പിച്ചതി​െൻറ ഭാഗമല്ലേ പുതിയ വിവാദങ്ങൾക്ക് കാരണമെന്ന ചോദ്യത്തിന് പാർട്ടിയിൽ പ്രശ്നങ്ങളില്ലെന്നായിരുന്നു മറുപടി. മേഖല പ്രസിഡൻറ് രാംദാസ്​ മണലേരിയും വാർത്തസമ്മേളനത്തിൽ സംബന്ധിച്ചു.