ഫാ. കുര്യാക്കോസ് കാട്ടുതറയുടെ സംസ്കാര ചടങ്ങിനിടെ ഫ്രാങ്കോക്കെതിരെ പ്രതിഷേധം

പൂച്ചാക്കൽ: ജലന്ധറിൽ മരണപ്പെട്ട ഫാ. കുര്യാക്കോസ് കാട്ടുതറയുടെ സംസ്കാര ചടങ്ങിനിടെ മുൻ ജലന്ധർ ബിഷപ്​ ഫ്രാങ്കോക്കെതിരെ ഒരുപറ്റം വിശ്വാസികൾ പ്രതിഷേധവുമായി രംഗത്തെത്തി. കേരള കത്തോലിക്ക സഭ നവീകരണ പ്രസ്ഥാനത്തി​​​െൻറ പേരിലാണ് ഇവർ രംഗത്തെത്തിയത്.

പള്ളിപ്പുറം ഫൊറോന പള്ളിയിൽ മരണാനന്തര ശുശ്രൂഷകൾ നടക്കവേ, പള്ളിക്ക് മുന്നിൽ ഫ്രാങ്കോക്കെതിരെ പ്ലക്കാർഡുകളുയർത്തിയും ചർച്ച്‌ ആക്ട് അടിയന്തരമായി നടപ്പാക്കണമെന്ന്​ ആവശ്യപ്പെട്ടുള്ള നോട്ടീസുകൾ വ്യാപകമായി വിതരണം ചെയ്​തുമാണ് പ്രതിഷേധക്കാർ രംഗത്തുവന്നത്. ഫ്രാങ്കോയുടെ ജാമ്യം റദ്ദാക്കുക, കാട്ടുതറയുടെ ഘാതകരെ കണ്ടെത്തുക, ഇന്ന് കാട്ടുതറ അച്ചനെങ്കിൽ നാളെ ഞങ്ങൾ, ഷെയിം റാപ്പിസ്​റ്റ്​ ഫ്രാങ്കോ തുടങ്ങി ഇംഗ്ലീഷിലും മലയാളത്തിലുമുള്ള പ്ലക്കാർഡോടെയാണ് പ്രതിഷേധക്കാർ അണിനിരന്നത്.

കന്യാസ്ത്രീകളുടെ കണ്ണുനീർ ഇനിയും വീഴാതിരുന്നാൽ മാത്രമേ ഈ സമരം വിജയിക്കുകയുള്ളുവെന്നും, സമ്പത്താണ് എല്ലാ ​െമത്രാൻമാരുടെയും കരുത്തെന്നത് കൊണ്ട്, ദേവസ്വം ബോർഡ്, വഖഫ് ബോർഡ് പോലെ ജനാധിപത്യ രീതിയിലുള്ള സ്വത്ത് ഭരണസമ്പ്രദായം ക്രിസ്തുമതത്തിലും കൊണ്ടുവരണമെന്നൊക്കെയാണ് ഇവരുടെ ആവശ്യം. പി.സി. ജോർജിനും കെ.എം. മാണിക്കും എതിരെ നിശിതമായ വിമർശനവും നോട്ടീസിലുണ്ട്.