കോവിഡ്​ നിയന്ത്രണം കാറ്റിൽ പറന്നു; ആംബുലൻസ് വെളിച്ചത്തിൽ നടുറോഡിൽ പിറന്നാളാഘോഷം

കുമളി: കോവിഡ് ആശങ്കക്കിടെ സംസ്ഥാന അതിർത്തിയിലെ പരിശോധന കേന്ദ്രത്തിലെ സന്നദ്ധ പ്രവർത്തക​​െൻറ പിറന്നാൾ ആംബുലൻസ്​ ലൈറ്റുകളുടെ അകമ്പടിയോടെ സുഹൃത്തുക്കൾ നടുറോഡിൽ കൊണ്ടാടിയത് വിവാദമാകുന്നു. കേരള-തമിഴ്നാട് അതിർത്തിയിൽ പ്രവർത്തിക്കുന്ന കോവിഡ് നിയന്ത്രണത്തി​​െൻറ ഭാഗമായ പാസ്​ പരിശോധനകേന്ദ്രത്തിലെ യുവാക്കളാണ് നിയന്ത്രണം കാറ്റിൽപറത്തി പിറന്നാൾ ആഘോഷിച്ചത്.

ബസ്​ സ്​റ്റാൻഡിന്​ സമീപത്തെ റോഡിൽ വ്യാഴാഴ്ച വൈകീട്ട് 7.30ഓടെയായിരുന്നു ആഘോഷം. നിർത്തിയിട്ടിരുന്ന ജീപ്പിന്​ മുകളിൽ കയറിനിന്ന് കേക്ക് മുറിക്കുന്നതും ആഘോഷത്തിന് കൊഴുപ്പേകാൻ മൂന്ന് ആംബുലൻസുകൾ കളർ ലൈറ്റുകൾ പ്രകാശിപ്പിക്കുന്നതും സമൂഹമാധ്യമം വഴി പുറത്തുവന്ന വിഡിയോയിൽ കാണാം.

തമിഴ്നാട്ടിൽനിന്ന്​ നൂറുകണക്കിന് ആളുകൾ ദിനംപ്രതി കടന്നുപോകുന്ന പരിശോധന കേന്ദ്രത്തിൽ, സന്നദ്ധ പ്രവർത്തനത്തിലുള്ള യുവാക്കൾ സമൂഹ അകലമോ കോവിഡ് നിയന്ത്രണമോ പാലിക്കാതെ കൂട്ടംചേർന്ന് നിൽക്കുന്നതും കേക്ക് മുഖത്തുതേച്ച് ആഘോഷിക്കുന്നതുമാണ്​ വിഡിയോയിലുള്ളത്​. രോഗം ബാധിച്ചവർ ഉൾ​െപ്പടെ കടന്നുപോയ പരിശോധന സ്ഥലത്തുനിന്ന്​ വീട്ടിലെത്തി അണുവിമുക്തമാക്കണമെന്നാണ് നിർദേശം.