പക്ഷിപനി: കൂട്ടത്തിലുള്ള എല്ലാ താറാവുകളെയും ​െകാല്ലേണ്ടിവരും - മന്ത്രി

ആലപ്പുഴ: പക്ഷിപ്പനിയെത്തുടർന്ന് ആലപ്പുഴ ജില്ലയിൽ മാത്രം ഇതുവരെ 38,312 താറാവുകളെ കൊന്നുവെന്ന് മൃഗസംരക്ഷണ മന്ത്രി കെ.രാജു. കൂട്ടത്തിലെ ഒരു താറാവിന് പക്ഷിപ്പനി സ്ഥിരീകരിച്ചാല്‍ ആ കൂട്ടത്തിലെ മുഴുവന്‍ താറാവുകളെയും കൊല്ലാൻ തീരുമാനിച്ചിട്ടുണ്ട്. പക്ഷിപ്പനി വ്യാപകമായതിനാല്‍ ലക്ഷക്കണക്കിന് താറാവുകളെ കൊല്ലേണ്ടിവരുമെന്നും അദ്ദേഹം പറഞ്ഞു. ആലപ്പുഴയിൽ പക്ഷിപ്പനി അവലോകന യോഗത്തിൽ സംസാരിക്കുകയായിരുന്നു കെ.രാജു.

താറാവുകളെ നഷ്​ടപ്പെട്ട കർഷകർക്ക് നഷ്​ടപരിഹാരം നൽകുമെന്നും മന്ത്രി അറിയിച്ചു.നഷ്​ടപരിഹാരം നല്‍കാന്‍ കൂടുതല്‍ തുക കേന്ദ്രത്തോട് ആവശ്യപ്പെടും. നഷ്​ടപരിഹാരതുക ഇന്നത്തെ മന്ത്രിസഭ യോഗം തീരുമാനിക്കുമെന്നും അദ്ദേഹം പറഞ്ഞു.  സ്വന്തമായി താറാവുകളെ കൊന്നവർക്കും നഷ്​ടപരിഹാരം ലഭ്യമാക്കുമെന്നും അദ്ദേഹം അറിയിച്ചു.