ബിൻസി മനം തുറക്കുന്നതും കാതോർത്ത്​​ രാഷ്​ട്രീയ പാർട്ടികൾ

കോട്ടയം: കോട്ടയത്തെ​ രാഷ്​ട്രീയ ചർച്ചകളുടെ ​ശ്രദ്ധാകേന്ദ്രം സംക്രാന്തിയിലെ ചാമത്തറ വീടാണ്​.​ അവിടെയാണ്​​ നഗരസഭ ഭരണത്തെ നിശ്ചയിക്കാൻ അവസരം കൈവന്ന ഏക സ്വത​ന്ത്ര അംഗം ബിൻസി സെബാസ്​റ്റ്യൻ താമസിക്കുന്നത്​​. ചർച്ചകൾ നടത്താൻ ഇരുമുന്നണി നേതാക്കളും മാറിമാറി ഈ വീട്ടിലെത്തുന്നുണ്ട്​.

തിരുവഞ്ചൂർ രാധാകൃഷ്​ണൻ എം.എൽ.എ, സി.പി.എം ജില്ല സെക്രട്ടറി വി.എൻ. വാസവൻ എന്നിവർ വീട്ടിലെത്തി ചർച്ചകൾ നടത്തി. എൽ.ഡി.എഫ്​ ജോസ്​ കെ.മാണിയെ മുൻനിർത്തിയും ചർച്ചകൾ നടത്തി. കോൺഗ്രസ്​ കുടുംബത്തിൽനിന്നുള്ള ആളായതിനാൽ ബിൻസിയെ കേരള കോൺഗ്രസ്​ എം വഴി എൽ.ഡി.എഫി​െൻറ ഭാഗമാക്കാനാണ്​ ലക്ഷ്യമിടുന്നത്​. ജോസ്​ കെ.മാണി വിഭാഗത്തിനും അതു െകാണ്ട്​ നേട്ടമാകും. ചെയർപേഴ്​സൻ സ്ഥാനം ആവശ്യപ്പെടുന്ന ബിൻസിക്ക്​ ആ പദവി നൽകി ഭരണം പിടിച്ചെടുക്കാൻ ഇരുമുന്നണിയും തയാറാണ്​.

യു.ഡി.എഫി​െൻറ കൈയിലിരുന്ന നഗരസഭ ഭരണം ഏതുവിധേനയും പിടിച്ചെടുക്കുക എന്നത്​ എൽ.ഡി.എഫിനും തങ്ങളുടെ നഗരസഭ വിട്ടുകൊടുക്കാതിരിക്കുക എന്നത്​ യു.ഡി.എഫിനും അഭിമാനപ്രശ്​നമാണ്​. അതിനുള്ള അണിയറ നീക്കങ്ങളാണ്​ നടക്കുന്നത്​.

എന്നാൽ, ബിൻസി ഇതുവരെ മനസ്സുതുറന്നിട്ടില്ല. 21ന്​ സത്യപ്രതിജ്​ഞക്കുശേഷമേ തീരുമാനമുണ്ടാവൂ എന്നാണ്​ ബിൻസിയുടെ നിലപാട്​. ത​െൻറ വിജയത്തിനുവേണ്ടി പ്രവർത്തിച്ച കോൺഗ്രസുകാരടക്കം പ്രവർത്തകരെ തള്ളിപ്പറയാനും ബിൻസി ഈ അവസരത്തിൽ തയാറായിട്ടില്ല.

വാർഡിലെ ജനങ്ങളുടെ തീരുമാനത്തിന്​ വിധേയമായേ തീരുമാനമെടുക്കൂ എന്നാണ്​ മാധ്യമപ്രവർത്തകരോടുള്ള ഇവരുടെ ​പ്രതികരണം.

നഗരസഭ 52ാം വാർഡിൽനിന്ന്​ (ഗാന്ധിനഗർ സൗത്ത്)​ കോൺഗ്രസ്​ വിമതയായാണ്​ ബിൻസി മത്സരിച്ചുജയിച്ചത്​. ഭർത്താവ്​ ഷോബി ലൂക്കോസ്​ കോൺഗ്രസ്​ വാർഡ്​ പ്രസിഡൻറായിരുന്നു. വാർഡ്​ വനിത സംവരണമായതോടെ​ ബിൻസിയെ നിർത്തി​ പ്രചാരണം തുടങ്ങിയ ശേഷമാണ്​ കോൺഗ്രസ്​ ബിൻസിയുടെ സ്ഥാനാർഥിത്വം അംഗീകരിക്ക​ാതെ മറ്റൊരു സ്ഥാനാർഥിയെ നിർത്തിയത്​. അതോടെ സ്വതന്ത്രയായി മത്സരിക്കാൻ തീരുമാനിക്കുകയായിരുന്നു. തുടർന്ന്​ ഷോബിയെ പാർട്ടിയിൽനിന്നും ഭാരവാഹിത്വത്തിൽനിന്നും പുറത്താക്കി. 22 സീറ്റുകളുമായി എൽ.ഡി.എഫ്​ ആണ്​ നിലവിൽ നഗരസഭയിലെ ഏറ്റവും വലിയ ഒറ്റക്കക്ഷി. കോൺഗ്രസുകാരിയായതിനാൽ തങ്ങൾക്കൊപ്പം നിൽക്കുമെന്നാണ്​ കോൺഗ്രസി​െൻറ പ്രതീക്ഷ.

എന്നാൽ, വാർഡ്​തല കമ്മിറ്റിയിൽ തന്നെ സ്ഥാനാർഥിയാക്കാൻ തീരുമാനിച്ചിട്ടും അത്​ അവഗണിച്ച്​ ഔദ്യോഗിക സ്​ഥാനാർഥിയെ നിർത്തിയ വാശി ബിൻസിക്കുമുണ്ട്​. മാത്രമല്ല, 21 സീറ്റുകൾ കൈയിലുള്ള യു.ഡി.എഫിനൊപ്പം പോയാൽ നറുക്കെടുപ്പിൽ ഭാഗ്യം തുണച്ചില്ലെങ്കിൽ ചെയർപേഴ്​സൻ പദവി നഷ്​ടമാവും. എട്ടു വോട്ടുകൾക്കാണ്​ ബിൻസി ജയിച്ചത്​. യു.ഡി.എഫി​െൻറ ഔദ്യോഗിക സ്​ഥാനാർഥിക്ക്​ പുറമെ ബി.ജെ.പി, എസ്​.ഡി.പി​.ഐ, എൽ.ഡി.എഫ്​ സ്വതന്ത്ര എന്നിവരും വാർഡിൽ മത്സരിക്കാനുണ്ടായിരുന്നു. എൽ.ഡി.എഫ്​ സ്വതന്ത്ര രണ്ടാംസ്ഥാനത്തും യു.ഡി.എഫി​െൻറ ഔദ്യോഗിക സ്​ഥാനാർഥി നാലാമതുമായി.