പീഡനകേസിൽ വിചാരണ നീട്ടണമെന്ന്​ ആവശ്യപ്പെട്ട്​ ബിനോയ്​ കോടിയേരി കോടതിയിൽ; എതിർക്കുമെന്ന് പരാതിക്കാരി

മുംബൈ: വിവാഹവാഗ്​ദാനം നൽകി പീഡിപ്പിച്ചെന്ന കേസിൽ വിചാരണ നീട്ടിവെക്കണമെന്നാവശ്യപ്പെട്ട്​ ബിനോയ്​ കോടിയേരി. ദുബൈയിലായതിനാൽ 21ന്​ വിചാരണക്ക്​ ഹാജരാകാനില്ലെന്ന്​ പറഞ്ഞും ഫെബ്രുവരി അവസാനത്തേക്ക്​ മാറ്റിവെക്കണമെന്ന്​ ആവശ്യപ്പെട്ടുമാണ്​ ദിൻദോഷി സെഷൻസ്​ കോടതിയിൽ ഹരജിനൽകിയത്​. ബിനോയിയുടെ ഹരജിയിൽ രേഖാമൂലം മറുപടി നൽകാൻ പരാതിക്കാരിയായ ബിഹാർ സ്വദേശിക്കും പൊലിസിനും സാവകാശം നൽകിയ കോടതി വാദം കേൾക്കുന്നത്​ വെള്ളിയാഴ്​ചത്തേക്ക്​ മാറ്റി.

ഡിസംബർ 15 നാണ്​ ബിനോയിക്കെതിരെ കുറ്റപത്രം സമർപ്പിച്ചത്​. 21ന്​ വിചാരണ തുടങ്ങാനിരിക്കുകയായിരുന്നു. നിലവിൽ ബിനോയ്​ ജാമ്യത്തിലാണ്​. വിചാരണ നീട്ടണമെന്ന ബിനോയിയുടെ ഹരജിയുടെ പകർപ്പ്​ ചൊവ്വാഴ്​ചയാണ്​ പരാതിക്കാരിയുടെ അഭിഭാഷകന്​ ലഭിച്ചത്​. വിചാരണ നടപടികൾ നീട്ടികൊണ്ട്​ പോകാനുള്ള നീക്കമാണെന്നും ഹരജിയെ എതിർക്കുമെന്നും പരാതിക്കാരിയുടെ അഭിഭാഷകൻ അബ്ബാസ്​ മുഖ്​തിയാർ പറഞ്ഞു.

തന്‍റെ മകന്​ നീതി ലഭിക്കാനാണ്​ നിയമ പോരാട്ടമെന്ന്​ കോടതിയിൽ എത്തിയ പരാതിക്കാരിയും പറഞ്ഞു. വിചാരണ തുടങ്ങിയാൽ പരാതിക്കാരിയുടെ മകന്‍റെ പിതൃത്വവുമായി ബന്ധപ്പെട്ട ഡി.എൻ.എ പരിശോധന റിപ്പോർട്ട്​ വിഷയം ഉന്നയിക്കുമെന്ന്​ യുവതിയുടെ അഭിഭാഷകൻ വ്യതമാക്കി. ബോംെമ്പ ഹൈകോടതി നിർദേശത്തെ തുടർന്നാണ്​ ബിനോയ്​ ഡി.എൻ.എ പരിശോധനക്ക്​ വിധേയനായത്​. റിപ്പോർട്ട്​ സീൽചെയ്​ത്​ ഹൈകോടതി രജിസ്​ട്രാർക്ക്​ മുമ്പാകെ സമർപ്പിച്ചിട്ടുണ്ട്​.