വെള്ളൂർ ന്യൂസ് പ്രിൻറ് ഫാക്ടറിയിൽ വൻതീപിടിത്തം; പേപ്പർ മെഷീൻ കത്തി നശിച്ചു

കോട്ടയം: കേരള സർക്കാറിന്‍റെ ഉടമസ്​ഥതയിലുള്ള വെള്ളൂർ ന്യൂസ് പ്രിൻറ് ഫാക്ടറിയിൽ (കേരള പേപ്പർ പ്രോഡക്ട്​സ്)​​ വൻതീപിടിത്തം. വ്യാഴാഴ്ച ​വൈകീട്ട്​​ ആറുമണിയോടെയാണ്​ തീപിടിത്തമുണ്ടായത്​. പേപ്പർമെഷീൻ പൂർണമായി കത്തിനശിച്ചു. തീപിടിത്തത്തിന്‍റെ കാരണം വ്യക്തമല്ല. കോടികളുടെ നഷ്ടമാണ്​ കണക്കാക്കുന്നത്.

കടുത്തുരുത്തി, വൈക്കം, പിറവം തുടങ്ങിയ സ്ഥലങ്ങളില്‍ നിന്നെത്തിയ ആറോളം ഫയര്‍ യൂനിറ്റുകള്‍ ചേർന്നാണ്​ ഒരു മണിക്കൂർ നീണ്ട പരിശ്രമത്തിനൊടുവിൽ തീ നിയന്ത്രണ വിധേയമാക്കിയത്. പേപ്പർ മെഷീനിന്‍റെ ഡ്രയറിന്‍റെ ഭാഗത്താണ്​ ആദ്യം തീ കണ്ടത്​. ഉടന്‍ തന്നെ ജീവനക്കാര്‍ തീ അണക്കാന്‍ ശ്രമിച്ചെങ്കിലും തീയും പുകയും മൂലം അടുക്കാന്‍ കഴിഞ്ഞില്ല.

വൻ തോതിൽ കരിയും ഉയർന്നു. പരിസരമാകെ കറുത്ത പുക നിറഞ്ഞു. കേബിളുകൾ കത്തിയതിനെ തുടർന്ന്​ വൈദ്യുതി തടസ്സപ്പെട്ടു. ഇരുട്ടത്ത്​ രക്ഷാപ്രവർത്തനം ദുഷ്കരമായിരുന്നു. അണക്കാന്‍ എത്തിയ പിറവം ഫയര്‍ സ്‌റ്റേഷനിലെ സീനിയര്‍ ഫയര്‍ ഓഫിസര്‍ കെ.എസ്. സുജീന്ദ്രനെ ശ്വാസം മുട്ടല്‍ അനുഭവപ്പെട്ടതിനെത്തുടര്‍ന്ന്​ സ്വകാര്യ ആശുപത്രിയില്‍ പ്രവേശിപ്പിച്ചു.