‘ത്രിവര്‍ണപതാകയും ജനങ്ങളുമാണ് ഭാരതമാതാവ്, ജയ് വിളിക്കാന്‍ കമ്യൂണിസ്റ്റുകാര്‍ക്ക് മടിയില്ല’; ആർ.എസ്​.എസിന്‍റെ കല്‍പനക്ക്​ വഴങ്ങില്ലെന്ന് ബിനോയ് വിശ്വം

തിരുവനന്തപുരം: ആർ.എസ്​.എസിന്‍റെ ഭാരതാംബയെ അടിച്ചേല്‍പിച്ചാൽ ആ കല്‍പനക്ക്​ വഴങ്ങില്ലെന്ന്​ സി.പി.ഐ സംസ്ഥാന സെക്രട്ടറി ബിനോയ് വിശ്വം. രാജ്ഭവനിലേക്ക് എ.ഐ.വൈ.എഫ് നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം.

ത്രിവര്‍ണപതാകയും വിവിധ വിഭാഗം ജനങ്ങളുമാണ് ഭാരതമാതാവ്. അവക്ക്​ ജയ് വിളിക്കാന്‍ കമ്യൂണിസ്റ്റുകാര്‍ക്ക് മടിയില്ല. മുന്‍ പ്രധാനമന്ത്രി നെഹ്റുവാണ് ഈ ആശയം മുന്നോട്ടുവെച്ചത്. അദ്ദേഹം പ്രസംഗിക്കുമ്പോള്‍ ഭാരത് മാതാ കീ ജയ് വിളിച്ച ജനക്കൂട്ടത്തോട് അതിന്റെ അർഥം അദ്ദേഹം ചോദിച്ചു.

നിങ്ങള്‍ നിങ്ങള്‍ക്കാണ് ജയ് വിളിച്ചതെന്നായിരുന്നു നെഹ്‌റു വിശദീകരിച്ചത്. കമ്യൂണിസ്റ്റ് പാര്‍ട്ടി ആ കൊടിയെയും ജനതയെയും മാനിക്കും. ഇന്ത്യക്ക്​ അറിയാത്ത ഏതോ ഒരു ഭൂപടമാണ് രാജ്ഭവന്‍ പരിസ്ഥിതി ദിനത്തില്‍ പ്രദര്‍ശിപ്പിച്ചത്. സിംഹത്തെ സിംഹാസനമാക്കി ഇരിക്കുന്ന പതാക ഏന്തിയ സ്ത്രീ. അതംഗീകരിക്കാനാവില്ലെന്നും ബിനോയ് വിശ്വം പറഞ്ഞു.