വണ്ടിയെ സ്​നേഹിച്ചതിന്​ കൊലപാതകിയെ പോലെ​ പെരുമാറുന്നു -ഇ ബുൾ ജെറ്റ്​; വാഹനം രൂപമാറ്റം വരുത്തിയത്​ നിരവധി തവണയെന്ന്​ ആർ.ടി.ഒ

കണ്ണൂർ: ഇ-ബുൾ ജെറ്റ്​ സഹോദരങ്ങളെ കസ്​റ്റഡിയിലെടുത്ത സംഭവത്തിൽ വിശദീകരണവുമായി മോ​ട്ടോർ വാഹന വകുപ്പ്​്​. വാഹനത്തിന്​ ടാക്​സ്​ അടക്കാൻ ബാക്കിയുണ്ടായിരുന്നുവെന്ന്​ കണ്ണൂർ ആർ.ടി.ഒ ഉണ്ണികൃഷ്​ണൻ പറഞ്ഞു.

പരാതി ലഭിച്ചതിന്‍റെ അടിസ്​ഥാനത്തിലാണ്​ നടപടി എടുത്തത്​. ഇവർ വാഹനം മൊത്തമായി​ രൂപമാറ്റം വരുത്തിയിട്ടുണ്ട്​. അഞ്ച്​ ടയറുകളും മാറ്റി. സെർച്ച്​ ലൈറ്റുകൾ അധിഘമായി ഘടിപ്പിച്ചു​. വാഹനത്തിന്‍റെ നിറം വെള്ളയിൽനിന്ന്​ കറുപ്പാക്കി മാറ്റി. ബോഡിയിൽ ഗ്രാഫിക്​സുകൾ​ ഉപയോഗിച്ചു.

മറ്റുള്ള യാത്രക്കാരെ ആകർഷിക്കുന്ന രീതിയിലുള്ള പരസ്യങ്ങളും ചിത്രങ്ങളും വാഹനത്തിൽ ഉണ്ടാകാൻ പാടില്ലെന്ന്​ കോടതി ഉത്തരവുണ്ട്​. ഇതും ഇവർ ലംഘിച്ചു. ഇതിനെ തുടർന്നാണ്​ വാഹനം പിടിച്ചെടുത്തത്​. ഓരോ ആൾട്ടറേഷനും 5000 രൂപ വെച്ചാണ്​ പിഴ ഈടാക്കിയത്​.

വാഹനത്തിൽ രൂപമാറ്റം വരുത്തുന്നത്​ മുമ്പ്​ അപേക്ഷ നൽകണം. ​നിയമത്തിനുള്ളിൽ നിൽക്കുന്നവക്ക്​​​ അനുമതി നൽകും. രൂപമാറ്റം വരുത്തിയ ശേഷം വാഹനം അധികൃതരെ കാണിക്കണം. എന്നാൽ, മാത്രമേ വാഹനം പുറത്തിറക്കാൻ കഴിയൂ എന്നും ആർ.ടി.ഒ അറിയിച്ചു.

അതേസമയം, തങ്ങൾക്കെതിരെ കള്ളക്കേസ്​ എടുത്തിരിക്കുകയാണെന്ന്​ എബിനും ലിബിനും ആരോപിച്ചു. ടാക്​സ്​ അടച്ചിട്ടില്ലെന്ന്​ പറഞ്ഞാണ്​ ആദ്യം എം.വി.ഡി വാഹനം പിടിച്ചുകൊണ്ടുപോയത്​. ടാക്​സിന്‍റെ പേപ്പർ കാണിച്ചപ്പോൾ വാഹനം വിട്ടുതന്നു.

അടുത്ത ദിവസം വീണ്ടും വന്ന്​ വാഹനം കൊണ്ടുപോവുകയായിരുന്നു. ഇപ്പോൾ 52,000 ​പിഴ അടക്കണമെന്നാണ്​ പറയുന്നത്​. ഓഫിസിൽ അതിക്രമം കാണിച്ചെന്നും കൃത്യനിർവഹണം തടസ്സപ്പെടുത്തിയെന്നും കാണിച്ച്​ പൊലീസ്​ കള്ളക്കേസ്​ എടുത്തിരിക്കുകയാണ്​. നിയമങ്ങൾക്കുള്ളിൽ നിന്നുകൊണ്ട്​ വണ്ടിയെ സ്​നേഹിച്ചതിന്​ കൊലപാതകിയെ പോലെയാണ്​ പെരുമാറുന്നതെന്നും ഇവർ മാധ്യമപ്രവർത്തകരോട്​ പറഞ്ഞു.

അതേസമയം, യൂട്യൂബർമാർ ആയാലും നിയമം ലംഘിച്ചാൽ മുഖം നോക്കാതെ നടപിയുണ്ടാകുമെന്ന്​ ഗതാഗത മന്ത്രി ആന്‍റണി രാജു വ്യക്​തമാക്കി. പ്രതികളെ തിങ്കളാഴ്ച വൈകീട്ട്​ മജിസ്​ട്രറ്റ്​ മുമ്പാകെ വിഡിയോ കോൺഫറൻസ്​ വഴ​ി ഹാജരാക്കും.

ഇ-ബുൾ ജെറ്റ്​ സഹോദരങ്ങളെ കസ്റ്റഡിയിലെടുത്തതറിഞ്ഞ്​ നിരവധി പേരാണ്​ പൊലീസ്​ സ്​റ്റേഷൻ പരിസരത്ത്​ തടിച്ചുകൂടിയത്​. കൂടാതെ സാമൂഹിക മാധ്യമങ്ങളിലും കാമ്പയിനുകൾ നടക്കുന്നുണ്ട്​.