കന്യാസ്ത്രീകളുടെ അറസ്റ്റ്: ആദ്യം നീതി, പിന്നെ മതി ചായകുടി -മാർ ബസേലിയോസ് ക്ലീമിസ്

തിരുവനന്തപുരം: ഛത്തിസ്​ഗഢി​ലെ ക്രൈസ്തവ വേട്ടയിൽ ബി.ജെ.പിക്കെതിരെ സ്വരം കടുപ്പിച്ചും തുറന്നടിച്ചും ​മലങ്കര കത്തോലിക്ക സഭ മേജര്‍ ആര്‍ച് ബിഷപ്പും കെ.സി.ബി.സി സംസ്​ഥാന പ്രസിഡന്‍റുമായ കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്ക ബാവ. ആദ്യം നീതി കിട്ട​ട്ടെ, അതിനുശേഷം ചായകുടിക്കാം. കന്യാസ്ത്രീമാർ ഇ​പ്പോഴും ജയിലിലാണ്​. അവർക്ക്​ ജാമ്യം കിട്ടിയിട്ടില്ല. അവർക്ക് ലഭിക്കേണ്ട നീതി നിഷേധിക്കു​മ്പോൾ പിന്നെ എന്ത് ചങ്ങാത്തം. എങ്ങനെയാണ് സാഹോദര്യത്തിന്റെ പൂർണത പറയാൻ കഴിയുക. ക്രിസ്​മസ്​-ഈസ്റ്റർ അവസരങ്ങളിലെ സൗഹൃദ സന്ദർശനങ്ങളെ പരോക്ഷമായി സൂചിപ്പിച്ചാണ്ണ്​ ക്ലീമിസ് ബാവയുടെ പരാമർശം.

ഭാവിയിലെ കേക്കുമായുള്ള സൗഹൃദ നയതന്ത്രത്തിൽ എന്ത്​ നിലപാടായിരിക്കുമെന്ന മാധ്യമപ്രവർത്തകരുടെ ചോദ്യത്തിന്​ കന്യാസ്​​ത്രീമാരുടെ അറസ്റ്റും ജാമ്യനിഷേധവും മാനദണ്ഡമാകുമെന്നും ഇതിനെ അടിസ്ഥാനപ്പെടുത്തിയാവും മുന്നോട്ടുപോവുകയെന്നും അദ്ദേഹം വ്യക്​തമാക്കി. ‘കേരളത്തിൽ കേക്കും ഉത്തരേന്ത്യയിൽ കൈവിലങ്ങു’മെന്ന സമീപനം ശരിയല്ലെന്ന്​ നേരത്തെ സീറോ മലബാർ സഭയും പ്രതികരിച്ചിരുന്നു.

‘ഭാരതത്തിലെ രണ്ട് സന്യാസിനിമാർ സ്വന്തം ദേശത്ത് അപമാനിക്കപ്പെടുന്ന സാഹചര്യമാണുണ്ടായത്​. അതാക​ട്ടെ കൃത്രിമമായുണ്ടാക്കിയ ആരോപണത്തിന്റെ അടിസ്ഥാനത്തിലും. പറയുന്നത് പ്രവർത്തിക്കണം. പ്രവർത്തിക്കുന്നതിൽ ആത്മാർത്ഥത വേണം. തങ്ങളുടെ ഏറ്റവും വലിയ പരിഗണന കന്യാസ്ത്രീമാർക്ക് നീതി ലഭിക്കുക എന്നതാണ്. നീതി ലഭിക്കുമെന്ന് ഉറപ്പാകുമ്പോഴാണ് മറ്റുള്ള സംസാരം. മതപരിവർത്തനമെന്നത്​ ആരോപണമാണെന്ന് ബി.ജെ.പി സംസ്ഥാന പ്രസിഡന്റ് വരെ പറഞ്ഞു. ഏതു മതത്തിൽ വിശ്വസിക്കാനും അത് പ്രചരിപ്പിക്കാനും ഇവിടെ ജീവിക്കാനും ഭരണഘടന ഉറപ്പുതരുന്ന സ്വാതന്ത്ര്യം നിലനിർത്താൻ എല്ലാവരും ഒരുമിച്ചു പ്രവർത്തിക്കണ’മെന്നും ആർച്ച്​ ബിഷപ്പ്​ കൂട്ടിച്ചേർക്കുന്നു.