ബാർബർ വീട്ടിലേക്ക്​; തലയൊന്നിന്​ 200 രൂപ

കാസർകോട്: വീടുകളിൽ ചെന്ന് മുടിമുറിക്കുന്ന ബാർബർ തൊഴിലാളികളിൽ ചിലർ അമിത നിരക്ക് ഈടാക്കുന്നുവെന്ന പരാതി വ്യാപകം. മുടിയും താടിയും മീശയും എടുക്കുന്നതിന് 200 രൂപ വരെയാണ് ചിലർ വാങ്ങുന്നത്. ലോക്​ഡൗൺ കാരണം ബാർബർ  ഷോപ്പുകൾ പൂട്ടിയതാണ്​ കാരണം. ബാർബർ തൊഴിലാളികൾ അവരവരുടെ വീടുകളിൽ മുടിമുറിക്കുന്ന ജോലി ചെയ്‌താണ് ഇപ്പോൾ ഉപജീവന മാർഗം കണ്ടെത്തുന്നത്​. 120 രൂപ  മുതൽ 130 രൂപ വരെയാണ് വീടുകളിൽ മുടിമുറിക്കുന്നതിന് വാങ്ങുന്നത്. മുടിയെടുക്കാൻ ബാർബർ തൊഴിലാളികളുടെ വീടുകളിൽ ചെല്ലുന്നവർ ഏറെയാണ്.

ലോക്​ഡൗൺ കാരണം അസൗകര്യം നേരിടുന്നവർ മുടി മുറിക്കാൻ ബാർബർ  തൊഴിലാളികളെ  തങ്ങളുടെ വീടുകളിലേക്ക് ഫോണിൽ വിളിച്ചു വരുത്തുന്നു. അധികം ദൂരെയല്ലാതെ സ്വന്തം വാഹനങ്ങളിൽ എത്തുന്ന ബാർബർ തൊഴിലാളികൾ പോലും 200 രൂപ വീതം വാങ്ങുന്നത് പ്രതിഷേധത്തിന് കാരണമായിട്ടുണ്ട്. അമിത നിരക്ക് ഈടാക്കുന്നതി​​െൻറ പേരിൽ  വാക്ക് തർക്കവും പതിവാണ്. കോവിഡ്​ കാലത്ത് ആളുകൾ ജോലിയും കൂലിയും ഇല്ലാതെ ദുരിതം അനുഭവിക്കുമ്പോൾ അമിത നിരക്ക് വാങ്ങുന്നതിലാണ്​ പ്രതിഷേധം. ബാർബർ ഷോപ്പുകളിലേതുപോലെ സൗകര്യപ്രദമായി മുടിമുറിക്കാനും  സാധിക്കുന്നില്ല.