ബാങ്ക് മാനേജരുടെ കണ്ണിൽ മുളകുപൊടി വിതറി സ്വർണം കവർന്നു

മൂവാറ്റുപുഴ: സ്കൂട്ടറിൽ എത്തിയ രണ്ടുപേർ നഗരമധ്യത്തിൽ സ്വകാര്യ ബാങ്ക് മാനേജരുടെ കണ്ണിൽ മുളകുപൊടി വിതറി 26 ലക്ഷം രൂപയുടെ സ്വർണം കവർന്നു. മൂവാറ്റുപുഴ തൃക്ക ക്ഷേത്രത്തിനുസമീപം വ്യാഴാഴ്ച ഉച്ചക്ക്​ ര​ണ്ടോടെയാണ് സംഭവം.

വാഴപ്പിള്ളിയിൽ പ്രവർത്തിക്കുന്ന സ്വകാര്യ ബാങ്കിലെ മാനേജരായ രാഹുലിനെയാണ് സ്കൂട്ടറിൽ എത്തിയ സംഘം ആക്രമിച്ചത്​. മറ്റൊരു ബാങ്കിൽനിന്ന്​ ടേക് ഓവർ ചെയ്ത സ്വർണവുമായി ബാങ്കിലേക്ക് മടങ്ങും വഴി തൃക്ക ക്ഷേത്രത്തിൽനിന്ന്​ ചില്ലറ വാങ്ങാനായി പോകുന്നതിനിടെയായിരുന്നു ആക്രമണം.

പിന്നാലെ സ്കൂട്ടറിൽ എത്തിയ സംഘം രാഹുലിനെ മറികടന്ന് പോയശേഷം തിരികെയെത്തി കണ്ണിൽ മുളകുപൊടി എറിഞ്ഞ്​ സ്വർണം അടങ്ങിയ ബാഗ് തട്ടിയെടുക്കുകയായിരുന്നു.

സ്കൂട്ടറിൽ എത്തിയവർ ഹെൽമറ്റ് ധരിച്ചിരുന്നുവെന്നും രാഹുൽ പറഞ്ഞു. സംഭവത്തിൽ മൂവാറ്റുപുഴ പൊലീസ് അന്വേഷണം ആരംഭിച്ചു. പരിസരത്തെ സി.സി.ടി.വി അടക്കം പൊലീസ് പരിശോധിച്ചു.