‘ബാഡ് ടച്ച്’: ഡോക്ടർ മോശമായി പെരുമാറിയെന്ന്​ മൊഴിയുടെ അടിസ്ഥാനത്തിൽ മാത്രം​ കരുതാനാവില്ല -ഹൈകോടതി

കൊച്ചി: തെറ്റായി സ്പർശിച്ചെന്ന (ബാഡ് ടച്ച്) പരാതിക്കാരിയുടെ മൊഴിയുടെ അടിസ്ഥാനത്തിൽ മാത്രം ഡോക്ടർ ലൈംഗിക ഉദ്ദേശ്യത്തോടെ പെരുമാറിയെന്ന്​ കരുതാനാവില്ലെന്ന്​ ഹൈകോടതി. കോഴിക്കോട് സ്വദേശിയായ 80കാരനായ ഡോക്ടർക്കെതിരെ പത്താംക്ലാസ്​ വിദ്യാർഥിനി നൽകിയ പരാതിയിൽ പോക്സോ അടക്കം വകുപ്പുകൾപ്രകാരമെടുത്ത കേസ് റദ്ദാക്കിയ ഉത്തരവിലാണ് ജസ്റ്റിസ് ജി. ഗിരീഷിന്റെ നിരീക്ഷണം.

2023 ഏപിലിൽ രണ്ടുദിവസങ്ങളിലായാണ് പരാതിക്കിടയായ സംഭവമുണ്ടായത്​. നെഞ്ചുവേദനയും വയറുവേദനയുമായി എത്തിയ കുട്ടിയെ പരിശോധിച്ചപ്പോൾ ഡോക്ടറുടെ ഭാഗത്തുനിന്ന്​ ലൈംഗികാതിക്രമമുണ്ടായി എന്നായിരുന്നു കുട്ടിയുടെ പരാതി. മാതാവിന്‍റെയും മൂത്ത സഹോദരിയുടെയും സന്നിധ്യത്തിലായിരുന്നു ഡോക്ടർ പരിശോധിച്ചത്​.

നെഞ്ചുവേദനക്കും വയറു വേദനക്കുമാണ്​ ശാരീരിക പരിശോധന നടത്തിയതെന്നതിനാൽ ലൈംഗികാതിക്രമമായി അതിനെ കണക്കാക്കാനാകില്ലെന്നും ഡോക്ടറുടെ പെരുമാറ്റത്തെ കൗമാരക്കാരി തെറ്റിദ്ധരിച്ചതാകാമെന്ന സാധ്യത തള്ളിക്കളയാനാകില്ലെന്നും കോടതി പറഞ്ഞു. മാതാപിതാക്കളുടെ സമ്മതത്തോടെ അവരുടെ സാന്നിധ്യത്തിൽ കുട്ടികളെ വൈദ്യപരിശോധനക്ക്​ വിധേയമാക്കുന്നത് പോക്സോ ആക്ടിന്റെ പരിധിയിൽ വരില്ലെന്ന്​ നിയമത്തിൽതന്നെ വ്യക്തമാക്കിയിട്ടുണ്ട്​. തുടർന്ന്​ കോഴിക്കോട് പോക്സോ കോടതിയിൽ സമർപ്പിച്ച കുറ്റപത്രം കോടതി റദ്ദാക്കി.