ഗവർണർക്ക് തിരിച്ചടി; കേരള സർവകലാശാല സെനറ്റ്​ നാമനിർദേശം ഹൈകോടതി റദ്ദാക്കി

കൊച്ചി: കേരള സർവകലാശാല സെനറ്റിന്‍റെ വിദ്യാർഥി മണ്ഡലത്തിലേക്കുള്ള​ ഗവർണറുടെ (ചാൻസലർ) നാമനിർദേശം ഹൈകോടതി റദ്ദാക്കി. സെനറ്റിലേക്ക്​ നാമനിർദേശം നടത്താൻ ചാൻസലർക്ക് അമിതവും അനിയന്ത്രിതവുമായ അധികാരങ്ങളില്ലെന്നും ചട്ടങ്ങൾ മറികടന്നാണ്​ നിയമനമെന്നും വിലയിരുത്തിയാണ്​ ജസ്റ്റിസ്​ സി.പി. മുഹമ്മദ്​ നിയാസിന്‍റെ ഉത്തരവ്​. ഹരജിക്കാരെ കൂടി പരിഗണിച്ച്​ ആറാഴ്ചക്കകം പുതിയ നാമനിർദേശം നടത്താനും കോടതി നിർദേശിച്ചു. അതേസമയം, സെനറ്റിലേക്ക്​ വിദ്യാഭ്യാസ വിദഗ്​ധ​രെ നാമനിർദേശം ചെയ്തതിനെതിരെ നൽകിയ മറ്റൊരു ഹരജി ​കോടതി തള്ളി.

സർവകലാശാല പട്ടികയിലുൾപ്പെട്ട അരുണിമ അശോക്, ടി.എസ്‌. കാവ്യ, നന്ദകിഷോർ, പി.എസ്‌. അവന്ത് സെൻ എന്നിവർ ചാൻസലർ നടത്തിയ നാമനിർദേശങ്ങൾ ചോദ്യം ചെയ്ത് നൽകിയ ഹരജിയാണ്​ കോടതി പരിഗണിച്ചത്​. ഇവർക്കുപകരം എ.ബി.വി.പി പ്രവർത്തകരായ അഭിഷേക്‌. ഡി. നായർ (ഹ്യുമാനിറ്റീസ്‌), എസ്‌.എൽ. ധ്രുവിന്‍ (സയൻസ്‌), മാളവിക ഉദയന്‍ (ഫൈൻ ആർട്‌സ്‌), സുധി സുധന്‍ (സ്‌പോർട്‌സ്) എന്നിവരെയാണ്​ ചാൻസലർ നാമനിര്‍ദേശം ചെയ്തത്​. ഈ നടപടിയാണ്​ കോടതി റദ്ദാക്കിയത്​.

നോമിനേഷന് പ്രത്യേക നടപടിക്രമങ്ങളില്ലെന്ന ചാൻസലറുടെ വാദം ശരിയാണെങ്കിലും നിയമനങ്ങൾ ചട്ടങ്ങൾ മറികടന്നാകരുതെന്ന്​ കോടതി ചൂണ്ടിക്കാട്ടി. നാമനിർദേശം ചെയ്യുന്നവർ മേഖലയിൽ കഴിവ്​ തെളിയിച്ചവരാകണമെന്ന ചട്ടം പാലിച്ചിട്ടില്ല. സർക്കാർ നിർദേശിച്ച പട്ടികയിലുള്ള ഹരജിക്കാരെക്കാൾ ഇവർക്ക്​ എന്താണ്​ കൂടുതൽ യോഗ്യത എന്നതിന്​ മറുപടി നൽകാനായിട്ടില്ല. നാമനിർദേശം ചെയ്യപ്പെട്ടവർക്ക്​ ഗവർണറുടെ പ്രീതിയുണ്ടെന്ന വാദം വ്യക്തമായ മറുപടിയല്ല. ഗവർണറുടെയും സർക്കാറിന്‍റെയും ‘പ്രീതി’ എന്ന സിദ്ധാന്തം ഉത്തരമല്ല- കോടതി വ്യക്തമാക്കി.

ഇതിനിടെ, അക്കാദമിക് വിദഗ്ധരായി സർക്കാർ നിർദേശിച്ച ജി. മുരളീധരൻ പിള്ള, ഡോ. ഷിജുഖാൻ, ആർ. രാജേഷ് എന്നിവർക്ക് യോഗ്യതയില്ലെന്നാരോപിച്ച്​​ ഡോ. കെ.എൻ. മധുസൂദനൻ പിള്ള നൽകിയ ഹരജി​ കോടതി തള്ളി​. ഒട്ടേറെ ക്രിമിനൽ കേസുകൾ ഇവ‌ർക്കെതിരെ നിലവിലുണ്ടെന്നായിരുന്നു വാദം. എന്നാൽ, ഇവർ ഉന്നത വിദ്യാഭ്യാസ രംഗത്തുള്ളവരല്ലെന്ന് പറയാനാകില്ലെന്ന്​ കോടതി ചൂണ്ടിക്കാട്ടി. പൊതുരംഗത്തെ പ്രവർത്തനവുമായി ബന്ധപ്പെട്ട കേസുകളാണ്​ ഇവർക്കെതിരെയുള്ളത്​. ഈ കേസുകളിൽ ഇവർ ശിക്ഷിക്കപ്പെട്ടിട്ടുമില്ല. അതിനാൽ, ഇവരുടെ നാമനിർദേശത്തിൽ അപാകതയില്ലെന്ന്​ വിലയിരുത്തിയ കോടതി ഹരജി തള്ളുകയായിരുന്നു.

INNER BOX

ഗവർണർ നിർദേശിച്ചത്​ കുറഞ്ഞ യോഗ്യതക്കാരെ

കൂടുതൽ യോഗ്യതയുള്ളവർക്കുപകരം കുറഞ്ഞ യോഗ്യതക്കാരെയാണ്​ ചാൻസലർ നാമനിർദേശം ചെയ്തതെന്ന്​ കോടതി ചൂണ്ടിക്കാട്ടി​. പ്രസക്തമായത്​ അവഗണിക്കുകയും അപ്രസക്തമായതിനെ സ്വീകരിക്കുകയും ചെയ്യുന്ന നടപടി ഉത്തരവാദപ്പെട്ടവരിൽനിന്നുണ്ടാകു​മ്പോൾ കോടതിയുടെ ഇടപെടലുണ്ടാകും. വിവേചനാധികാരം പ്രയോഗിക്കേണ്ടത്​ നിഷ്പക്ഷവും നീതി പൂർവകവുമായാണ്. ഹരജിക്കാരിൽ റാങ്ക് ജേതാവും കലാപ്രതിഭയും കായികപ്രതിഭയുമുണ്ട്. ഇവരെ തഴഞ്ഞ്​ ചാൻസലർ നിർദേശിച്ചവർ മേളകളിൽ പങ്കെടുത്തിട്ടുണ്ടെന്നല്ലാതെ കഴിവ്​ തെളിയിച്ചവരല്ല. നിർദേശിക്കപ്പെടുന്നവർ റാങ്ക്​ പോലുള്ള ഉന്നത സ്ഥാനീയരാകണമെന്ന്​ നിബന്ധനയില്ലെങ്കിലും ഇവരുടെ പേര്​ പട്ടികയിലുൾപ്പെട്ടിരിക്കെ, യോഗ്യത കുറഞ്ഞവരെ നാമനിർദേശം ചെയ്തതിൽ ന്യായീകരണമില്ലെന്ന്​ കോടതി വ്യക്തമാക്കി.