കോടതിയിൽ ഹാജരാകുന്നതിൽ നിന്ന് ഒഴിവാക്കണമെന്ന് ബാബാ രാംദേവും ബാലകൃഷ്ണയും

പാലക്കാട്: ഔഷധ പരസ്യനിയമം ലംഘിച്ചതിന് വിചാരണ നേരിടുന്ന യോഗാചാര്യൻ ബാബാ രാംദേവും ബാലകൃഷ്ണയും ജാമ്യമില്ലാ വാറന്റിൽ ഹാജരാകുന്നതിൽ നിന്ന് ഒഴിവാക്കണമെന്നാവശ്യപ്പെട്ട് അഭിഭാഷകൻ മുഖേന പാലക്കാട് ജുഡീഷ്യൽ ഫസ്റ്റ് ക്ലാസ് ​മജിസ്ട്രേറ്റ് കോടതി-2നെ സമീപിച്ചു. കോടതിയിലെത്തുന്നത് ഒഴിവാക്കണമെന്ന യോഗാചാര്യൻ ബാബാ രാ​ംദേവിന്റെയും ബാലകൃഷ്ണയുടെയും ആവശ്യം, ചൊവ്വാഴ്ച നടന്ന വിചാരണയിൽ പരാതിക്കാരായ പാലക്കാട് ഡ്രഗ്സ് ഇൻസ്​പെക്ടർ എതിർത്തു. ഇരുവരുടെയും ജാമ്യമില്ലാ വാറന്റ് ഒഴിവാക്കണമെന്ന ആവശ്യത്തിൽ വിധി പറയാൻ ഈ മാസം 14ലേക്ക് മാറ്റി.

തെറ്റിദ്ധരിപ്പിക്കുന്ന ഫലസിദ്ധി വാഗ്ദാനംചെയ്ത് ഡ്രഗ്സ് ആൻഡ് മാജിക് റെമഡീസ് (ഒബ്ജക്ഷനബ്ൾ അഡ്വൈർടൈസ്മെന്‍റ്) ആക്ട് 1954 സെക്ഷൻ 3 (ഡി) ലംഘിച്ചതുമായി ബന്ധപ്പെട്ട് പാലക്കാട് ഡ്രഗ്സ് ഇൻസ്​പെക്ടർ ഫയൽചെയ്ത കേസിലാണ് നടപടി. കേസിൽ കഴിഞ്ഞ 16ന് ഹാജരാകാൻ സമൻസ് അയച്ചിരുന്നു. വരാതിരുന്നതിനെത്തുടർന്ന് ​ഫെബ്രുവരി ഒന്നിന് നേരിട്ട് ഹാജരായി ജാമ്യമെടുക്കാൻ പാലക്കാട് കോടതി വാറന്റ് പുറപ്പെടുവിച്ചു. എന്നിട്ടും നേരിട്ട് ഹാജരാകാതിരുന്ന പ്രതികൾക്കെതിരെയാണ് ജാമ്യമില്ലാ വാറന്റ് പുറപ്പെടുവിച്ചത്.