അവതാര്‍ ഗോള്‍ഡ് ഉടമയുടെ ഭാര്യ അറസ്​റ്റിൽ

തൃശൂര്‍: ജ്വല്ലറി തട്ടിപ്പുമായി ബന്ധപ്പെട്ട കേസില്‍ അകപ്പെട്ട അവതാര്‍ ഗോള്‍ഡ് ഉടമയുടെ ഭാര്യ ഫൗസിയ അബ്​ദുല്ലയെ പൊലീസ് അറസ്​റ്റ്​ചെയ്തു. പെരുമ്പാവൂരില്‍ ഒരു ജ്വല്ലറി ഏറ്റെടുത്ത്​ നടത്താന്‍ കരാർ ഒപ്പുവെച്ചശേഷം ജ്വല്ലറിയിലുണ്ടായിരുന്ന 12 കോടി രൂപയുടെ ആഭരണങ്ങള്‍ കടത്തിക്കൊണ്ടുപോയി തട്ടിപ്പ്​ നടത്തിയെന്ന കേസിലാണ് അറസ്​റ്റ്​. തുടര്‍ന്ന് മുങ്ങുകയായിരുന്നു. മുന്‍കൂര്‍ ജാമ്യത്തോടെ വിദേശത്തുനിന്ന്​ കേരളത്തിലേക്ക് മടങ്ങിയെത്തിയപ്പോഴാണ് ഫൗസിയയെ ചാവക്കാട്ടുനിന്ന് പെരുമ്പാവൂര്‍ പൊലീസ് കസ്​റ്റഡിയിലെടുത്തത്. ഈ കേസില്‍ അവതാര്‍ ഉടമ ഒ. അബ്​ദുല്ലയെ നേര​േത്ത പിടികൂടിയിരുന്നു. കേസിലെ രണ്ടും മൂന്നും പ്രതികളായ ഫൗസിയയും മകന്‍ ഫാരിസും അറസ്​റ്റ്​ ഒഴിവാക്കാന്‍ ഗള്‍ഫിലേക്ക്​ മുങ്ങുകയായിരുന്നു. ഫാരിസ് ഒളിവിലാണ്.

പെരുമ്പാവൂരിലെ ഫഫാസ് ഗോള്‍ഡ് എന്ന ജ്വല്ലറിയുടെ ഉടമ വെങ്ങോല പട്ടരുമഠം സലീമി​​െൻറ പരാതിയിലാണ് അറസ്​റ്റ്​. ജ്വല്ലറി ഏറ്റെടുത്തുനടത്താമെന്ന് അബ്ദുള്ള കരാര്‍ ഒപ്പിട്ടിരുന്നു. തുടര്‍ന്ന്, ജ്വല്ലറിയിലുണ്ടായിരുന്ന 30 കിലോയിലേറെ സ്വര്‍ണം  കൈക്കലാക്കി വഞ്ചിച്ചെന്നാണ് പരാതി. പൊലീസ് കേസെടുത്തത്​ അറിഞ്ഞ അബ്​ദുല്ലയും കുടുംബവും ഗള്‍ഫിലേക്ക്​ കടന്നു.  

തിരികെ കോഴിക്കോട്ടെത്തിയ സമയത്ത് പ്രത്യേക അന്വേഷണ സംഘം അബ്​ദുല്ലയെ പിടികൂടിയിരുന്നു. പിന്നാലെ ഫൗസിയയും  മകന്‍ ഫാരിസും കോടതിയില്‍നിന്ന്​ മുന്‍കൂര്‍ ജാമ്യമെടുത്തു. രണ്ടാഴ്ച മുമ്പ്​ കേരളത്തിലേക്ക്​ മടങ്ങിയെങ്കിലും മംഗളൂരു  എയര്‍പോര്‍ട്ടില്‍ എമിഗ്രേഷന്‍ വിഭാഗം ഇവരെ അറസ്​റ്റ്​ചെയ്‌തെങ്കിലും മുന്‍കൂര്‍ ജാമ്യം ഹാജരാക്കി ഇരുവരും പുറത്തെത്തി. പരാതിക്കാരന്‍ വീണ്ടും കോടതിയെ സമീപിച്ചതോടെ ഇരുവരുടെയും മുന്‍കൂര്‍ ജാമ്യം റദ്ദാക്കി.