എ.വി. ജോർജിനെ തിരിച്ചെടുത്തു; ഇൻറലിജൻസ്​ എസ്​.പിയായി

തിരുവനന്തപുരം: വരാപ്പുഴ ശ്രീജിത്തി‍​​െൻറ കസ്​റ്റഡി മരണവുമായി ബന്ധപ്പെട്ട്​  സസ്പെന്‍ഷനിലായിരുന്ന എറണാകുളം മുൻ റൂറല്‍ എസ്.പി എ.വി. ജോര്‍ജിനെ സര്‍വിസില്‍ തിരിച്ചെടുത്തു. ജോര്‍ജിന് കസ്​റ്റഡികൊലപാതകത്തില്‍ പങ്കില്ലെന്ന ക്രൈംബ്രാഞ്ച് റിപ്പോര്‍ട്ടി‍​​െൻറ പശ്ചാത്തലത്തിലും സസ്​പെൻഷൻ കാലാവധി കഴിഞ്ഞതി​​​െൻറ അടിസ്ഥാനത്തിലുമാണ് സര്‍വിസില്‍ തിരിച്ചെടുത്തത്.

ഇൻറലിജന്‍സ് വിഭാഗം എസ്​.പിയായാണ്​ ജോര്‍ജിന് പുനര്‍നിയമനം നല്‍കിയത്​. മൂന്നുമാസത്തേക്കായിരുന്നു സസ്‌പെന്‍ഷന്‍. കഴിഞ്ഞദിവസം രാത്രിയാണ് ഇതുസംബന്ധിച്ച ഉത്തരവ് പുറത്തിറങ്ങിയത്. സർവിസില്‍ തിരിച്ചെടുത്തെങ്കിലും ജോർജിനെതിരായ വകുപ്പുതല അന്വേഷണം തുടരും. ജോര്‍ജിനെതിരെ സി.ബി.ഐ അന്വേഷണം ആവശ്യപ്പെട്ട് ശ്രീജിത്തി​​​െൻറ കുടുംബം ഹൈകോടതിയെ സമീപിച്ചെങ്കിലും അത് തള്ളിക്കളഞ്ഞിരുന്നു. ജോര്‍ജ് പ്രതിയല്ലെന്ന് കോടതിയെ സര്‍ക്കാര്‍ അറിയിക്കുകയും ചെയ്തിരുന്നു. 

എറണാകുളം റൂറല്‍ എസ്.പിയായിരിക്കെ എ.വി. ജോര്‍ജ് രൂപം നൽകിയ ‘ടൈഗര്‍ഫോഴ്സ്’ എന്ന പൊലീസ്​ വിഭാഗമാണ് ആളുമാറി ശ്രീജിത്തിനെ വീട്ടില്‍ നിന്ന്​ പിടിച്ചുകൊണ്ടുപോയത്. കസ്​റ്റഡിയില്‍ ക്രൂരമായി മര്‍ദനമേറ്റ ശ്രീജിത്ത് പിന്നീട് മരിക്കുകയായിരുന്നു. നിയമവിരുദ്ധമായാണ്  ടൈഗര്‍ഫോഴ്സിന് എസ്​.പി രൂപം നൽകിയതെന്നും ശ്രീജിത്തി​​​െൻറ കസ്​റ്റഡിമരണത്തിൽ എ.വി. ജോര്‍ജിനെ പ്രതിയാക്കണമെന്നും ബന്ധുക്കള്‍ ആവശ്യപ്പെട്ടിരുന്നു.  പ്രതിഷേധം ശക്തമായതിനെതുടർന്നാണ്​ ​േമയ് 11ന്​  ജോര്‍ജിനെ സസ്പെൻഡ്​ ചെയ്തത്.