Begin typing your search above and press return to search.
exit_to_app
exit_to_app
Homechevron_rightNewschevron_rightKeralachevron_rightമക്കൾക്കൊപ്പം...

മക്കൾക്കൊപ്പം തീകൊളുത്തി യുവതിയുടെ ആത്മഹത്യാശ്രമം, രണ്ട് കുട്ടികൾ മരിച്ചു

text_fields
bookmark_border
മക്കൾക്കൊപ്പം തീകൊളുത്തി യുവതിയുടെ ആത്മഹത്യാശ്രമം, രണ്ട് കുട്ടികൾ മരിച്ചു
cancel
camera_alt

മരിച്ച ആതിരയും അരൂഷും

അങ്കമാലി: തുറവൂരിൽ യുവതിയായ വീട്ടമ്മ മക്കളോടൊപ്പം അടച്ചിട്ട മുറിയിൽ കയറി തീകൊളുത്തി നടത്തിയ ആത്മഹത്യ ശ്രമത്തിൽ മക്കൾ മരിച്ചു. അമ്മ ഗുരുതരാവസ്ഥയിൽ. അങ്കമാലി തുറവൂർ പെരിങ്ങാംപറമ്പിൽ ഏലംന്തുരുത്തി വീട്ടിൽ അനൂപിന്റെ മക്കളായ ആതിര (ചിന്നു - ഏഴ്), അരൂഷ് (കുഞ്ചു - മൂന്ന്) എന്നിവരാണ് മരിച്ചത്.

അനൂപിന്റെ ഭാര്യ അഞ്ജുവിനെ (32) ശരീരമാസകലം പൊള്ളലേറ്റ് അവശനിലയിൽ തൃശൂർ മെഡിക്കൽ കോളജിലെ തീവ്ര പരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്. ബുധനാഴ്ച ഉച്ചക്ക് രണ്ടിനായിരുന്നു സംഭവം. അനൂപ് ഒരു മാസം മുമ്പ് ഹൃദയാഘാതത്തെ തുടർന്ന് മരണപ്പെട്ടിരുന്നു.

ഭർത്താവിന്റെ വേർപ്പാടിന് ശേഷം തികഞ്ഞ നിരാശയോടെയായിരുന്നു അഞ്ജു ദിവസങ്ങൾ തള്ളി നീക്കിയിരുന്നത്. ബുധനാഴ്ച ഉച്ചക്ക് രണ്ട് മക്കളേയും കൂട്ടി വീട്ടിലെ കിടപ്പുമുറിയിൽ പ്രവേശിച്ച ശേഷം മുറിക്കകത്ത് സൂക്ഷിച്ചിരുന്ന മണ്ണെണ്ണ അഞ്ജു മൂവരുടെയും ദേഹത്ത് ഒഴിച്ച ശേഷം തീകൊളുത്തുകയായിരുന്നുവത്രെ. കുട്ടികളുടെ ആർത്തിരമ്പിയുള്ള കരച്ചിലും മുറിയിൽ തീ ആളിപ്പടരുന്നതും കണ്ട് ബന്ധുക്കളും നാട്ടുകാരും പാഞ്ഞെത്തി വാതിൽ ചവുട്ടി പൊളിച്ച് നോക്കിയപ്പോൾ മൂവരും നിന്ന് കത്തുകയായിരുന്നു.

വെള്ളമൊഴിച്ചും, ചാക്ക് നനച്ചെറിഞ്ഞും രക്ഷാ പ്രവർത്തനത്തിന് ശ്രമിച്ചെങ്കിലും ഫലമുണ്ടായില്ല. സംഭവമറിഞ്ഞ അങ്കമാലി അഗ്നി രക്ഷസേന സ്ഥലത്ത് കുതിച്ചെത്തി മൂവരേയും സേനയുടെ ആംബുലൻസിൽ കയറ്റി അങ്കമാലി എൽ.എഫ് ആശുപത്രിയിലേക്ക് കൊണ്ട് പോയെങ്കിലും രണ്ട് കുട്ടികളും വഴിമധ്യേ മരിച്ചു. ശരീരമാസകലം പൊള്ളലേറ്റ് അവശനിലയിലായ അഞ്ജുവിന്റെ നില കൂടുതൽ വഷളായതോടെ തൃശൂർ മെഡിക്കൽ കോളജിലെ തീവ്ര പരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്. അനൂപിന്റെ വേർപ്പാടിലുള്ള മനോവിഷമമാകാം കുട്ടികളോടൊപ്പം ആത്മഹത്യക്ക് ശ്രമിച്ചതെന്നാണ് പൊലിസ് പറയുന്നത്. കുട്ടികളുടെ മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

Show Full Article
TAGS:suicide attempt 
News Summary - Attempted suicide of a young woman with her children, two children died
Next Story