കുട്ടികളെ തട്ടിക്കൊണ്ടുപോകുന്നുവെന്നാരോപിച്ച്​ മർദനം; നാല്​ പേർ കസ്​റ്റഡിയിൽ

കൂത്തുപറമ്പ്​: കണ്ണൂർ കൂത്തുപറമ്പിലെ മാനന്തേരിയിൽ ബീഹാർ സ്വദേശിയായ യുവാവിനെ ക്രൂരമായി മർദിച്ച സംഭവത്തിൽ 15 പേർക്കെതിരെ കേസെടുത്തു. നാല്​ പേരെ കസ്​റ്റഡിയിൽ എടുത്തിട്ടുണ്ട്​. പി.ഷൈജു, വിശ്വനാഥൻ, മുനാഫിർ ഖാദർ, എ. രാജീവൻ എന്നിവരെയാണ്​ കസ്​റ്റഡിയിലെടുത്തത്​.

ഇന്നലെയായിരുന്നു ചോട്ടു എന്ന്​ പേരുള്ള ബിഹാർ സ്വദേശിയെ കുട്ടികളെ തട്ടിക്കൊണ്ടുപോകുന്നുവെന്ന്​ ആരോപിച്ച്​ നാട്ടുകാർ ക്രൂരമായി മർദിച്ചത്​.  മർദിക്കുന്ന ദൃശ്യങ്ങൾ പകർത്തി സാമൂഹ്യ മാധ്യമങ്ങളിൽ പ്രചരിപ്പിക്കുകയും ചെയ്​തിരുന്നു.

നാട്ടുകാർ കണ്ണവം പൊലീസ്​ സ്​റ്റേഷനിൽ എത്തിച്ച യുവാവിനെ ചോദ്യം ചെയ്​തതിൽ ഇയാൾക്ക്​ മാനസിക രോഗമുണ്ടെന്ന്​ സംശയിക്കുന്നതായി​ പൊലീസ്​ പറഞ്ഞിരുന്നു. ചോട്ടു കുട്ടികളെ തട്ടിക്കൊണ്ട്​ ​പോകുന്നതിന്​ യാതൊരു തെളിവും ലഭിച്ചിട്ടില്ലെന്നും ​പൊലീസ്​ അറിയിച്ചു.