നിധിയായ്​ ഓർമകൾ, ആതിര പ്രിയപ്പെട്ടവന്​ വിടചൊല്ലി

​കോഴിക്കോട്​: സങ്കടക്കടലിരമ്പുകയായിരുന്നു അവിടെ കൂടിയിരുന്ന ഓരോ മനസ്സിലും. അത്രമേൽ സ്​നേഹിച്ചൊരാളെ അവസാനമായി ഒരുനോക്ക്​ കാണാനൊരുങ്ങുന്നൊരുവളുടെ ദുഃഖം അവരെല്ലാം നെഞ്ചിലേറ്റിയിരുന്നു.

തന്നെയും കുഞ്ഞിനെയും കാണാൻ വരുമെന്ന വാക്ക് പാലിക്കാനാകാതെ യാത്രയായ നിധിന് വിട ചൊല്ലാൻ​ ഭാര്യ ആതിരയെത്തിയ കാഴ്​ച എല്ലാവരെയും കണ്ണീരിലാഴ്​ത്തി. 

ദുബൈയിൽ ഹൃദയാഘാതം മൂലം മരിച്ച നിധിൻ ചന്ദ്രന്‍റെ മൃതദേഹം ഭാര്യ ആതിരക്ക് ഒരുനോക്ക് കാണാന്‍ കോഴിക്കോട് മിംസ് ആശുപത്രിയിലേക്ക്​ എത്തിച്ചപ്പോളാണ്​ നൊമ്പര നിമിഷങ്ങൾ അരങ്ങേറിയത്​. ചൊവ്വാഴ്​ച ആതിര പെൺകുഞ്ഞിന്​ ജന്മം നൽകിയിരുന്നു​. ഇതറിയാതെ കണ്ണാടിക്കൂട്ടിനുള്ളിൽ നിത്യനിദ്രയിലായിരുന്ന നിധിന്​ ആതിര അന്തിമോപചാരമർപ്പിച്ചത്​ കണ്ണീർകാഴ്​ചയായി. 

നിധിൻെറ മൃതദേഹം കാണിക്കാൻ ആതിരയെ ആംബുലൻസിനടുത്തേക്ക്​ കൊണ്ടുവരുന്നു (ചിത്രം: പ്രകാശ്​ കരിമ്പ)

 

ഷാർജയിൽ നിന്ന് എയർ അറേബ്യയുടെ പ്രത്യേക വിമാനത്തിൽ ബുധനാഴ്​ച രാവിലെയാണ് നിധിന്‍റെ മൃതദേഹം നെടുമ്പാശേരി വിമാനത്താവളത്തില്‍ എത്തിച്ചത്. അവിടെ നിന്ന്​ പത്തേമുക്കാലോടെ ആതിര ചികിത്സയിൽ കഴിയുന്ന കോഴിക്കോട്​ മിംസ്​ ആശുപത്രിയിലെത്തിച്ചു. ആതിരയും മറ്റ്​ കുടുംബാംഗങ്ങളും അന്തിമോപചാരം അര്‍പ്പിച്ചതിന് പിന്നാലെ മൃതദേഹം പേരാമ്പ്രയിലെ വീട്ടിലെത്തിച്ചു. വൈകീട്ട്​ പേരാമ്പ്രയിലാണ് സംസ്കാരം.

തിങ്കളാഴ്ച പുലര്‍ച്ചെയാണ് ഷാര്‍ജയിലെ താമസ സ്ഥലത്ത് നിധിന്‍ ചന്ദ്രനെ മരിച്ച നിലയില്‍ കണ്ടെത്തിയത്. ഉറക്കത്തിനിടെയുണ്ടായ ഹൃദയാഘാതത്തെ തുടര്‍ന്നായിരുന്നു മരണം. മരണവിവരമറിഞ്ഞ ബന്ധുക്കൾ പ്രസവത്തിന്​ മുമ്പുള്ള കോവിഡ്​ പരിശോധനക്കെന്ന്​ പറഞ്ഞ്​ ആതിരയെ ആശുപത്രിയിലേക്ക്​ മാറ്റി. ജൂ​ൈല ആദ്യവാരമായിരുന്നു പ്രസവം കണക്കാക്കിയിരുന്നതെങ്കിലും നിധി​ന്‍റെ മരണവിവരം അറിയിക്കുന്നതിന്​ മുമ്പ്​ പ്രസവ ശസ്​ത്രക്രിയ നടത്താൻ തീരുമാനിക്കുകയായിരുന്നു. ചൊവ്വാഴ്​ച രാവിലെ 11.40ന്​ ആതിര പെൺകുഞ്ഞിന്​ ജന്മം നൽകുകയും ചെയ്​തു. 

നിധി​ന്‍റെ മൃതദേഹം ആശുപത്രിയിൽ എത്തിക്കുന്നതിന്​ തൊട്ടുമുമ്പാണ്​ ആതിരയെ ഡോക്​ടർമാർ മരണവിവരം അറിയിക്കുന്നത്​. വാവിട്ട്​ കരഞ്ഞ ആതിരയെ എങ്ങ​ിനെ ആശ്വസിപ്പിക്കുമെന്നറിയാതെ ഡോക്​ടർമാരും ബന്ധുക്കളും കുഴങ്ങി. 11 മണിയോടെയാണ്​ മാസ്​കും സുരക്ഷാവസ്​ത്രവുമണിയിച്ച്​ ആതിരയെ വീൽചെയറിൽ ആംബുലൻസിനടുത്തേക്ക്​ കൊണ്ടുവന്നത്​. കരൾ നുറുങ്ങുന്ന വേദനയിൽ ആതിര പ്രിയതമന്​ വിടചൊല്ലുകയും ചെയ്​തു. 

കോവിഡ് കാലത്ത് വിദേശത്ത് നിന്ന് ഗര്‍ഭിണികള്‍ അടക്കമുള്ള പ്രവാസികള്‍ക്ക് മടങ്ങി വരാനായി നിധിനും ആതിരയുമാണ് സുപ്രീം കോടതിയെ സമീപിച്ചിരുന്നത്. മേയ് എട്ടിന് വന്ദേഭാരത് മിഷനിലെ ആദ്യ വിമാനത്തില്‍ തന്നെ ആതിര നാട്ടിലേക്ക് തിരിച്ചു. ഭാര്യക്കൊപ്പം നാട്ടിലേക്ക് മടങ്ങാന്‍ നിധിന് അനുമതി ലഭിച്ചിരുന്നെങ്കിലും ആ അവസരം മറ്റൊരാള്‍ക്ക് നല്‍കുകയായിരുന്നു.

റിട്ട. ഹെൽത്ത് ഇൻസ്പെക്ടർ രാമചന്ദ്രന്‍റെ മകനാണ് നിതിൻ. കേ​ര​ള ബ്ല​ഡ് ഗ്രൂ​പ്പി​ന്‍റെ യു​.എ​.ഇ​യി​ലെ കോ​ര്‍​ഡി​നേ​റ്റ​റും കോ​ൺ​ഗ്ര​സി​ന്‍റെ പോ​ഷ​ക സം​ഘ​ട​ന​യാ​യ ഇ​ൻ​കാ​സ് യൂ​ത്ത് വിങി​ന്‍റെ സ​ജീ​വ പ്ര​വ​ർ​ത്ത​ക​നുമായിരുന്നു. കോവിഡ് അല്ലെന്ന് സ്ഥിരീകരിച്ചതോടെയാണ്​ മൃതദേഹം നാട്ടിലെത്തിക്കാൻ നടപടിയുണ്ടായത്​.