നിയമസഭ അതിക്രമം: കേസ്​ റദ്ദാക്കണമെന്ന ഹരജി ഒക്​ടോബർ 13ന്​ പരിഗണിക്കും

കൊച്ചി: നിയമസഭയിലെ അതിക്രമവുമായി ബന്ധപ്പെട്ട കേസ്​ റദ്ദാക്കണമെന്ന മന്ത്രി വി. ശിവൻകുട്ടിയടക്കമുള്ളവരുടെ ഹരജി ഹൈകോടതി ഒക്​ടോബർ 13ന്​ പരിഗണിക്കാൻ മാറ്റി.

മന്ത്രി വി. ശിവൻകുട്ടി, മുൻ മന്ത്രിമാരായ ഇ.പി. ജയരാജൻ, കെ.ടി. ജലീൽ, മുൻ എം.എൽ.എമാരായ കെ. അജിത്, കുഞ്ഞഹമ്മദ് മാസ്‌റ്റർ, സി.കെ. സദാശിവൻ എന്നിവർ നൽകിയ ഹരജിയാണ്​ ഹരജിക്കാരുടെ അഭിഭാഷകൻ തിങ്കളാഴ്ച ഹാജരാകാൻ അസൗകര്യം അറിയിച്ചതിനെ തുടർന്ന് ജസ്റ്റിസ്​ എ.എ. സിയാദ്​ റഹ്​മാൻ മാറ്റിയത്​.

ഹരജി തീർപ്പാകുംവരെ തിരുവനന്തപുരത്ത് കോടതിയിലെ വിചാരണ സ്റ്റേ ചെയ്യണമെന്ന ഹരജിക്കാരുടെ ആവശ്യം നേരത്തേ തള്ളിയിരുന്നു. ബാർ കോഴക്കേസിൽ ആരോപണ വിധേയനായ ധനമന്ത്രി ബജറ്റ് അവതരിപ്പിക്കുന്നത് തടയാനുള്ള സമരത്തിനിടെയാണ് 2015 മാർച്ച് 13ന് നിയമസഭയിൽ അക്രമസംഭവമുണ്ടായത്.