പൗരത്വ നിയമത്തെ എതിർക്കുമ്പോൾ പരിധി കടക്കരുത് -ആര്യാടൻ

തേഞ്ഞിപ്പലം: പൗരത്വ നിയമം, എൻ.ആർ.സി., എൻ.പി.ആർ എന്നിവയെ പരിധിവിട്ട് എതിർക്കുന്നത് ഗുണത്തേക്കാളേറെ ദോഷം ചെയ്യുമെ ന്ന് കോൺഗ്രസ് നേതാവ് ആര്യാടൻ മുഹമ്മദ്. കാലിക്കറ്റ് യൂനിവേഴ്സിറ്റി ജവഹർലാൽ നെഹ്റു സെന്‍റർ ഫോർ സ്റ്റഡീസ് ആൻഡ് ഡ െവലപ്മെന്‍റിന്‍റെ പ്രഥമ നെഹ്റു സെക്കുലർ അവാർഡ് സ്വീകരണ പരിപാടിയിൽ സംസാരിക്കുകയായിരുന്നു അദ്ദേഹം.

ഇവിടെ ഹിന്ദുക്കൾ മാത്രമായിരുന്നു ഉണ്ടായിരുന്നത്. നമ്മുടെ പൂർവികരെല്ലാം ഹിന്ദുക്കളായിരുന്നു. ഇന്ത്യക്ക് പൈതൃകമായി കിട്ടിയതാണ് മതേതരത്വം. ആ മതേതരത്വം തകർക്കാൻ നരേന്ദ്ര മോദി അല്ല ആര് ശ്രമിച്ചാലും അനുവദിക്കരുത്.
പൗരത്വ നിയമം, എൻ.ആർ.സി., എൻ.പി.ആർ എന്നിവയെ നമ്മൾ എതിർക്കുന്നു. പക്ഷേ എതിർക്കുമ്പോൾ പരിധി കടക്കരുത്. പരിധിവിട്ട് ചാടിയിട്ട് കാര്യമില്ല. അത് ഗുണത്തേക്കാളേറെ ദോഷം ചെയ്യും -ആര്യാടൻ പറഞ്ഞു.

നരേന്ദ്ര മോദിയെ എതിർക്കണം, അതിൽ യാതൊരു സംശയവുമില്ല. ഇവിടെ ജനങ്ങളെ രണ്ട് തട്ടാക്കാൻ അനുവദിക്കാൻ പാടില്ല. പൗരത്വ നിയമം മുസ്ലിംകളെ മാത്രമല്ല ബാധിക്കുക, എല്ലാവരെയും ബാധിക്കുമെന്നും അദ്ദേഹം വ്യക്തമാക്കി.