ഡോ. സിസ തോമസിനെ വി.സിയാക്കിയത്​ വിദ്യാർഥികളുടെ ഭാവിയെ കരുതിയെന്ന്​ ചാൻസലർ ഹൈകോടതിയിൽ

കൊച്ചി: വിദ്യാർഥികളുടെ ഭാവി അവതാളത്തിലാകാതിരിക്കാനാണ് സാങ്കേതിക സർവകലാശാല (കെ.ടി.യു) താൽക്കാലിക ​​​വൈസ്​ ചാൻസലറായി ഡോ. സിസ തോമസിനെ നിയമിച്ചതെന്ന്​ ചാൻസലർ കൂടിയായ ഗവർണർ ഹൈകോടതിയിൽ. വി.സിയായിരുന്ന ഡോ. എം.എസ്. ജയശ്രീയുടെ നിയമനം സുപ്രീംകോടതി റദ്ദാക്കിയ സാഹചര്യത്തിൽ താൽക്കാലിക വി.സിയായി സാ​ങ്കേതിക വിദ്യാഭ്യാസ ഡയറക്‌ടറേറ്റിലെ സീനിയർ ജോ. ഡയറക്ടർ ഡോ. സിസയെ നിയമിച്ചതിൽ നിയമപരമായി അപാകതയില്ല.

വി.സി മാറുന്നതോടെ പ്രോ വി.സിയും മാറണമെന്നാണ് യു.ജി.സി ചട്ടമെന്നതിനാൽ അദ്ദേഹത്തിന്​ താൽക്കാലിക ചുമതല നൽകാനാവില്ല. ഡിജിറ്റൽ സർവകലാശാല വി.സി ഡോ. സജി ഗോപിനാഥിന് ചുമതല കൈമാറാൻ സർക്കാർ ശിപാർശ ചെ​യ്​തെങ്കിലും ഈ നിയമനം സംശയകരമായതിനാലാണ്​ അംഗീകരിക്കാതിരുന്നത്​. ഉന്നത വിദ്യാഭ്യാസ പ്രിൻസിപ്പൽ സെക്രട്ടറിക്ക് ചുമതല കൈമാറാനും സർക്കാർ ശിപാർശ ചെയ്​തെങ്കിലും വി.സിയായി നിയമി​ക്കപ്പെടേണ്ടത്​ വിദ്യാഭ്യാസ വിദഗ്‌ധനാകണമെന്ന​ സുപ്രീംകോടതി വിധിയും യു.ജി.സി മാനദണ്ഡങ്ങളും സർവകലാശാലയുടെ സ്വയംഭരണാവകാശവും പരിഗണിച്ച്​ അതും അംഗീകരിച്ചില്ലെന്ന്​ ചാൻസലർ വിശദീകരിച്ചു.

ഡോ. സിസ തോമസിനെ താൽക്കാലിക വി.സിയായി നിയമിച്ചതിനെതിരെ സർക്കാർ നൽകിയ ഹരജിയിലാണ് ഈ വിശദീകരണം. വി.സിയില്ലെന്ന കാരണത്താൽ ഡിഗ്രി സർട്ടിഫിക്കറ്റ് ലഭിക്കാത്ത സാഹചര്യമുണ്ടാകാതിരിക്കാനാണ് ഡോ. സിസ തോമസിന് ചുമതല നൽകിയത്​. എൻജിനീയറിങ്​ കോളജുകളിൽ 10 വർഷത്തിലേറെ അധ്യാപന പരിചയമുള്ള പ്രഫസർമാരുടെ പട്ടിക ശേഖരിച്ചാണ്​ നിയമനം നടത്തിയത്​. സാ​ങ്കേതിക വിദ്യാഭ്യാസ ഡയറക്ടറോട്​ ആവർത്തിച്ച് ആവശ്യപ്പെട്ടിട്ടും പട്ടിക നൽകാതിരുന്നതിനെ തുടർന്നാണ് യോഗ്യത വിലയിരുത്തി നേരിട്ട്​ നിയമനം നടത്തിയത്​. ഗവർണറുടെ വിജ്ഞാപനം ചോദ്യംചെയ്ത് ഉന്നത വിദ്യാഭ്യാസ അഡീഷനൽ സെക്രട്ടറി നൽകിയ ഹരജി നിയമപരമായി നിലനിൽക്കില്ലെന്നും വിശദീകരണത്തിൽ വ്യക്തമാക്കുന്നു. ഇതിന്​ മറുപടി നൽകാൻ സർക്കാർ സമയം തേടിയതിനെ തുടർന്ന്​ ഹരജി നവംബർ 23ലേക്ക്​ മാറ്റി.