Begin typing your search above and press return to search.
exit_to_app
exit_to_app
Homechevron_rightNewschevron_rightKeralachevron_rightമധു വധം: മാതാവിനെ...

മധു വധം: മാതാവിനെ ഭീഷണിപ്പെടുത്തിയ കേസിലെ പ്രതിയുടെ മുൻകൂർ ജാമ്യ ഹരജി തള്ളി

text_fields
bookmark_border
മധു വധം: മാതാവിനെ ഭീഷണിപ്പെടുത്തിയ കേസിലെ പ്രതിയുടെ മുൻകൂർ ജാമ്യ ഹരജി തള്ളി
cancel

കൊച്ചി: അട്ടപ്പാടിയിൽ കൊല്ലപ്പെട്ട ആദിവാസി യുവാവ്​ മധുവിന്‍റെ മാതാവ്​ മല്ലിയെ കേസിൽനിന്ന്​ പിന്മാറാൻ ഭീഷണിപ്പെടുത്തിയെന്ന കേസിലെ ഒന്നാം പ്രതിയുടെ മുൻകൂർ ജാമ്യ ഹരജി ഹൈകോടതി തള്ളി. പ്രഥമദൃഷ്ട്യാ കേസ്​ വ്യക്തമല്ലെന്നും അനാവശ്യമായി കേസിൽ ഉൾപ്പെടുത്തിയതാണെന്നും കാട്ടി പാലക്കാട്​ കുമരംപുത്തൂർ സ്വദേശി ആർ.വി. അബ്ബാസ്​ നൽകിയ ഹരജിയാണ്​ ജസ്റ്റിസ്​ എ. ബദറുദ്ദീൻ തള്ളിയത്​.

മണ്ണാർക്കാട്​ പ്രത്യേക കോടതി മുൻകൂർ ജാമ്യ ഹരജി തള്ളിയതിനെത്തുടർന്നാണ്​ ഹൈകോടതിയെ സമീപിച്ചത്​. ഒന്നാം പ്രതിയും രണ്ടാം പ്രതിയും ചേർന്ന്​ ജൂലൈ എട്ടിന്​ വീട്ടിൽ അതിക്രമിച്ചുകയറി​ ഭീഷണിപ്പെടുത്തിയെന്നാണ്​ കേസ്​. എന്നാൽ, ആരോപണം അടിസ്ഥാനരഹിതമാണെന്നായിരുന്നു ഹരജിക്കാരന്‍റെ വാദം.

പട്ടികവിഭാഗക്കാർക്കുനേരെയുള്ള അതിക്രമം തടയൽ നിയമത്തിലെ 18ാം വകുപ്പ്​ പ്രകാരം മുൻകൂർ ജാമ്യത്തിന്​ വിലക്കുണ്ടെന്നായിരുന്നു​ പ്രോസിക്യൂഷന്‍റെയും മല്ലിയുടെയും വാദം. എന്നാൽ, ഇത്തരം കേസുകളിൽ കേസെടുക്കാൻ പ്രാഥമിക അന്വേഷണമോ അറസ്റ്റിന്​ മുൻകൂർ അനുമതിയോ വേണ്ടെന്നുമാണ്​ വ്യവസ്ഥയെന്നും പ്രഥമദൃഷ്ട്യാ കേസ് നിലവിലുണ്ടെന്ന്​ തോന്നുന്നില്ലെങ്കിൽ മുൻകൂർ ജാമ്യം അനുവദിക്കുന്നതിന്​ തടസ്സമില്ലെന്നും കോടതി പറഞ്ഞു.

അതേസമയം, പട്ടിക വർഗക്കാരിയാണെന്ന്​ അറിഞ്ഞുകൊണ്ടുതന്നെ പരാതിക്കാരിയുടെ വീട്ടിൽ അതിക്രമിച്ചു കയറുകയാണ്​ പ്രതികൾ ചെയ്​തതെന്നും കുറ്റകൃത്യം പ്രഥമദൃഷ്ട്യാ വ്യക്തമായതിനാൽ മുൻകൂർ ജാമ്യം അനുവദിക്കാനാവില്ലെന്നും കോടതി വ്യക്തമാക്കി.

Show Full Article
TAGS:Madhu Murder 
News Summary - anticipatory bail plea of ​​the accused in the case of threatening the Madhu mother was rejected
Next Story