റാഗിങ്​ വിരുദ്ധ കർമസമിതി: സർക്കാറിന്​ ഒരാഴ്ച സമയം അനുവദിച്ച്​ ഹൈകോടതി; സർക്കാർ ആവശ്യപ്പെട്ടത്​ ഒരു മാസം

കൊച്ചി: റാഗിങ്​ വിഷയത്തിൽ കർമസമിതി രൂപവത്​​കരിക്കാൻ ഒരു മാസം സമയം തേടിയ സർക്കാറിന്​ ഹൈകോടതി അനുവദിച്ചത്​ ഒരാഴ്ച. അടിയന്തര പ്രാധാന്യമുള്ള വിഷയമായതിനാൽ ഒരു മാസം അനുവദിക്കാനാവില്ലെന്ന്​ വിലയിരുത്തിയ​ ചീഫ് ജസ്റ്റിസ് നിതിൻ ജാംദാർ, ജസ്റ്റിസ് സി. ജയചന്ദ്രൻ എന്നിവരടങ്ങുന്ന പ്രത്യേക ബെഞ്ച് ഒരാഴ്ചക്കകം സമിതി രൂപവത്​കരിച്ച് വിവരം അറിയിക്കാൻ നിർദേശം നൽകി.

റാഗിങ്​ വിരുദ്ധ നിയമങ്ങൾ കർശനമായി നടപ്പാക്കണമെന്ന്​ ആവശ്യപ്പെട്ട് കേരള ലീഗൽ സർവിസസ് അതോറിറ്റി (കെൽസ) നൽകിയ പൊതുതാൽപര്യ ഹരജിയാണ്​ കോടതിയു​ടെ പരിഗണനയിലുള്ളത്.

റാഗിങ്​ തടയാനുള്ള അഭിപ്രായങ്ങൾ സ്വരൂപിച്ച് ശിപാർശകൾ നൽകാൻ വിവിധ മേഖലകളിൽനിന്നുള്ള പ്രതിനിധിക​ളെ ഉൾപ്പെടുത്തി കർമസമിതിയുണ്ടാക്കാൻ മാർച്ച് അഞ്ചിന് കോടതി ഉത്തരവിട്ടിരുന്നു. രണ്ടാഴ്ച അനുവദിച്ചിരുന്നെങ്കിലും ഒരു മാസം കൂടി ലഭ്യമാക്കണമെന്ന്​ ആഭ്യന്തര വകുപ്പ് ബുധനാഴ്ച കോടതിയിൽ ആവശ്യപ്പെടുകയായിരുന്നു.

എന്നാൽ, ഹരജി വീണ്ടും പരിഗണിക്കുന്ന 26ന് കർമസമിതിയുടെ ഘടന സംബന്ധിച്ച കരട് സമർപ്പിക്കാനാണ്​ ​സർക്കാറിനോട്​ ആവശ്യപ്പെട്ടിരിക്കുന്നത്​. ഹരജിയിൽ കക്ഷിചേരാൻ രമേശ് ചെന്നിത്തല എം.എൽ.എയും പൂക്കോട്​ വെറ്ററിനറി കോളജിൽ മരിച്ച സിദ്ധാർഥന്‍റെ മാതാവ്​ ഷീബയും ഉപ ഹരജികൾ നൽകിയിരുന്നു. ഇവരുടെയും മറ്റ്​ കക്ഷികളുടെയും അഭിപ്രായങ്ങൾ ആദ്യം കർമസമിതിയിൽ സമർപ്പിക്കാൻ കോടതി ആവശ്യപ്പെട്ടു.

ആഭ്യന്തര സെക്രട്ടറിയെ കക്ഷിചേർത്ത കോടതി, കർമസമിതിയിൽ യു.ജി.സിയുടെയും കെൽസയുടെയും പ്രതിനിധികളെ ഉൾപ്പെടുത്തണമെന്ന ആവശ്യം പരിഗണിക്കണമെന്നും നിർദേശിച്ചു.