കോഴിക്കോട്ട് വീണ്ടും ഷിഗെല്ല

കോഴിക്കോട്: എരഞ്ഞിക്കലിൽ ആറു വയസ്സുകാരിക്ക് ഷിഗെല്ല ബാക്ടീരിയ സ്ഥിരീകരിച്ചു. വയറിളക്കമടക്കമുള്ള അസുഖങ്ങൾ കാരണം കുട്ടി പുതിയാപ്പ പ്രാഥമികാരോഗ്യകേന്ദ്രത്തിൽ ചികിത്സ തേടിയിരുന്നു. ഇവിടെനിന്ന് സാമ്പിളുകൾ പരിശോധനക്കയച്ചു.

ഫലം പുറത്തുവന്നപ്പോഴാണ് ഷിഗെല്ല കണ്ടെത്തിയത്. കുട്ടിയുടെ ആരോഗ്യസ്ഥിതിയിൽ ആശങ്കപ്പെടേണ്ടെന്ന് ആരോഗ്യവകുപ്പ് അധികൃതർ പറഞ്ഞു. ഈ മാസം 16ന് ചികിത്സ കഴിഞ്ഞ കുട്ടി വീട്ടിൽ വിശ്രമത്തിലാണ്. മറ്റൊരു കുട്ടിക്കുകൂടി രോഗ ലക്ഷണമുണ്ട്.മലിനജലത്തിലൂടെ ബാക്ടീരിയ ശരീരത്തിനുള്ളിലേക്ക് കടക്കുന്നതാണ് ഷിഗെല്ലക്ക് കാരണം.