ആൻലിയയുടെ മരണം: റെയിൽവേ സ്​റ്റേഷനിൽ തെളിവെടുപ്പ് നടത്തി

ചാവക്കാട്: നഴ്​സ്​ ആൻലിയയുടെ ദുരൂഹ മരണം അന്വേഷിക്കുന്ന ക്രൈംബ്രാഞ്ച് സംഘം കസ്​റ്റഡിയിൽ വാങ്ങിയ ആൻലിയയുടെ ഭർത്താവ് വി.എ. ജസ്​റ്റിനുമായി തൃശൂർ ​െറയിൽവേ സ്​റ്റേഷനിൽ തെളിവെടുപ്പ് നടത്തി. കഴിഞ്ഞ ആഗസ്​റ്റ്​​ 25 ന് തൃശൂർ റെയിൽവേ സ്​റ്റേഷനിൽ നിന്നാണ്​ ആൻലിയയെ കാണാതായത്​.

ആഗസ്​റ്റ് 28ന് ആലുവക്ക് സമീപം പെരിയാർ പുഴയിൽ മൃതദേഹം കണ്ടെത്തുകയും ചെയ്തു. മകളുടെ മരണത്തിൽ ദുരൂഹതയുണ്ടെന്ന്​ മാതാപിതാക്കളായ ഫോർട്ടുകൊച്ചി നസ്രേത്ത് പാലക്കൽ ഹൈജിനസ് (അജി പാലക്കൽ), ഭാര്യ ലീല എന്നിവർ പരാതി നൽകിയിരുന്നു. ആൻലിയയെ കാണാതായത് സംബന്ധിച്ച് ഭർത്താവ് തൃ​​ശൂർ മുല്ലശ്ശേരി അന്നകര കരയിൽ വി.എം. ജസ്​റ്റിൻ (29) തൃശൂർ റെയിൽവേ പൊലീസിലും പരാതി നൽകിയിരുന്നു.

ഗുരുവായൂർ എ.സി.പി ശിവദാസനായിരുന്നു കേസ് അന്വേഷണ ചുമതല. എന്നാൽ ഹൈജിനസ് മുഖ്യമന്ത്രിക്ക് പരാതി നൽകിയതിനെ തുടർന്നാണ്​ അന്വേഷണം ക്രൈംബ്രാഞ്ചിന്​ കൈമാറിയത്. തൃശൂർ ക്രൈം എസ്.പി കെ. സുദർശ​​​െൻറ മേൽനോട്ടത്തിൽ ഡിവൈ.എസ്.പി വി.എ. ഉല്ലാസാണ് കേസ് അന്വേഷിക്കുന്നത്.

ആദ്യം ഒളിവിൽ പോയ ജസ്​റ്റിൻ മാത്യു മുൻകൂർ ജാമ്യം ലഭിക്കാതിരുന്നതിനെ തുടർന്ന്​ ചാവക്കാട് കോടതിയിൽ കീഴടങ്ങിയിരുന്നു. കഴിഞ്ഞ ബുധനാഴ്​ചയാണ് വിയ്യൂർ സെൻട്രൽ ജയിലിൽ റിമാൻഡിൽ കഴിയുന്ന ജസ്​റ്റിനെ ചോദ്യം ചെയ്യാൻ ക്രൈം ബ്രാഞ്ച് കസ്​റ്റഡിയിൽ വാങ്ങിയത്. രണ്ട് ദിവസത്തെ തെളിവെടുപ്പിനു ശേഷം ഇയാളെ തിരികെ കോടതിയിലെത്തിച്ചു. കേസ്​ അന്വേഷണം സംബന്ധിച്ച് വിശദമാക്കാൻ ക്രൈംബ്രാഞ്ച് ഉദ്യോഗസ്ഥർ തയാറായില്ല. സി.ഐ രാജേഷ് കെ. മേനോൻ, എസ്.ഐ ശങ്കരൻകുട്ടി എന്നിവരാണ് കേസ്​ അന്വേഷിക്കുന്നത്​.