അനി​ലിന്‍റെ ബി.ജെ.പി പ്രവേശനത്തിന്‍റെ ആഘാതത്തിൽ ആന്‍റണിയും കോൺഗ്രസും

തിരുവനന്തപുരം: മുതിർന്ന കോൺഗ്രസ്​ നേതാവ്​ എ.കെ. ആന്‍റണിയുടെ മകൻ ബി.ജെ.പിയിൽ​ ചേക്കേറിയത്​​ പല കോൺഗ്രസ്​ നേതാക്കളും പ്രതീക്ഷിച്ചതാണെങ്കിലും ഇത്ര വേഗത്തിലാകുമെന്ന്​ കരുതിയിരുന്നില്ല.

താമരക്കളത്തിലേക്ക്​ അനിലിന്‍റെ പോക്ക്​ സി.പി.എമ്മിനും ബി.ജെ.പിക്കും മികച്ച രാഷ്ട്രീയ ആയുധവും മതേതര നിലപാടുകൾ എന്നും ഉയർത്തിപ്പിടിച്ച ആന്‍റണിക്ക്​ വ്യക്തിപരമായും രാഷ്​ട്രീയമായും കനത്ത തിരിച്ചടിയുമായി. മോദിക്കെതിരായ വിമർശനം കടുപ്പിക്കുന്ന സാഹചര്യത്തിൽ മുതിർന്ന നേതാവിന്‍റെ മകൻ ബി.ജെ.പിയിൽ ചേരുന്നത്​ മറുപടി പോലും പറയാൻ കഴിയാത്ത സ്ഥിതിയിലേക്ക്​ കോൺഗ്രസിനെ എത്തിച്ചിട്ടുണ്ട്​. ആന്‍റണിയുടെ മകനായതിനാൽ വിമർശനത്തിൽ മിതത്വം പാലിക്കുകയാണ്​ നേതാക്കൾ.

അനിൽ ആന്‍റണിയെന്ന വ്യക്തിയെ അല്ല, ആറു​ പതിറ്റാണ്ടിലേറെ​ രാഷ്ട്രീയരംഗത്ത്​ പ്രശോഭിതനായി നിന്ന ആന്‍റണിയുടെ വിലാസം ഉപയോഗപ്പെടുത്താനാകും ബി.ജെ.പി ശ്രമിക്കുക. അനിലിന്‍റെ പോക്കിൽ സമൂഹ മാധ്യമങ്ങളിൽ ആന്‍റണിക്കെതിരെ കടുത്ത വിമർശനമുയരുന്നുണ്ട്​. കോൺഗ്രസ്​ നേതാക്കൾ അനിലിനെ തള്ളുമ്പോഴും ആന്‍റണിക്ക്​ ഒരു വിധത്തിലും ബുദ്ധിമുട്ടുണ്ടാക്കാതിരിക്കാൻ ശ്രദ്ധിക്കുന്നു. ബി.ജെ.പിയിലേക്കുള്ള പോക്ക്​ പിതാവുമായി അനിൽ ചർച്ച ചെയ്തിരുന്നില്ലെന്നാണ്​ അദ്ദേഹം തന്നെ വെളിപ്പെടുത്തിയത്​.

ആന്‍റണിയുടെ മകൻ ബി.ജെ.പിയിൽ ചേർന്നത്​ കോൺഗ്രസിന്​ വലിയ നാണക്കേടാണ്​​. ആദർശ രാഷ്ട്രീയത്തിന്‍റെ പ്രതിരൂപമാണ്​ ദേശീയ രാഷ്ട്രീയത്തിൽ ആന്‍റണി. അദ്ദേഹത്തിന്‍റെ രാഷ്​ട്രീയത്തെ അപ്പാടെ തള്ളിയാണ്​ മകൻ ബി.ജെ.പി പാളയത്തിലെത്തിയത്​.ബി.ബി.സി വിവാദത്തോടെ തന്നെ അനിൽ പാർട്ടിയുമായി അകന്നിരുന്നു. പാർലമെന്‍റ്​ തെരഞ്ഞെടുപ്പിലടക്കം കോൺഗ്രസിന്​ ഇത്​ പ്രയാസം സൃഷ്ടിക്കും. ബി.ജെ.പിയെ നേരിടാൻ കോൺഗ്രസിനാകില്ലെന്നും നേതാക്കൾ ബി.ജെ.പിയിലേക്ക്​ ചേക്കേറുകയാണെന്നും സി.പി.എം നിരന്തരം വിമർശിക്കുകയാണ്​. ഇതിന്​ സാധൂകരണം നൽകാൻ അനിലിന്‍റെ നിലപാട്​ ഇടതുപക്ഷം ആയുധമാക്കും.

ആന്‍റണിയുടെ മകൻ എന്നതിലപ്പുറം അനിലിന്​ പാർട്ടിയിലോ സംസ്ഥാനത്തോ സ്വാധീനമില്ല. പുറത്തു​പോകേണ്ടവർക്ക്​ പോകാമെന്നാണ്​ നേരത്തേ പ്രതിപക്ഷ നേതാവ്​ വി.ഡി. സതീശൻ പറഞ്ഞിരുന്നത്​. ​

വളഞ്ഞ വഴിയിൽ അനിലിനെ പാർട്ടിയിൽ കൊണ്ടുവന്നതിനെ കുറ്റപ്പെടുത്തുകയാണ്​ യുവനേതാക്കൾ. ആന്‍റണിയുടെ മകൻ ബി.ജെ.പിയിൽ ചേർന്നതിനു​ പിന്നാലെ, ഉമ്മൻ ചാണ്ടിക്കൊപ്പമുള്ള ചിത്രം ചാണ്ടി ഉമ്മൻ പങ്കുവെച്ചു.