അനിൽ നെടുമങ്ങാടി​െൻറ വേർപാട്​: നടുക്കം മാറാതെ ദീപൻ ശിവരാമൻ

തൃശൂർ: സ്​കൂൾ ഓഫ്​ ഡ്രാമയിലെ സതീർഥ്യ​െൻറ നിര്യാണം ഏൽപ്പിച്ച ആഘാതത്തിലാണ്​ നാടക സംവിധായകൻ ദീപൻ ശിവരാമൻ. മികച്ച അഭിനേതാവെന്ന ഉന്നതിയിലേക്കുള്ള യാത്രക്കിടെയായിരുന്നു നടൻ അനിൽ നെടുമങ്ങാടിനെ മരണം കവർന്നതെന്ന്​ അദ്ദേഹം 'മാധ്യമ'ത്തോട്​ പറഞ്ഞു.''1997ൽ അനിലിനൊപ്പം ഞാനും തൃശൂരിലെ സ്​കൂൾ ഓഫ്​ ഡ്രാമയിലുണ്ടായിരുന്നു. എ​െൻറ ആറ്​ നാടകങ്ങളിൽ അനിൽ പ്രധാന വേഷങ്ങളിൽ അഭിനയിച്ചിട്ടുണ്ട്​. തിയറ്ററിൽ കേരളത്തിലുണ്ടായ മികച്ച നടന്മാരിലൊരാളാണ്​ അനിൽ. സ്​കൂൾ ഓഫ്​ ഡ്രാമ വിട്ട ശേഷവും ഞങ്ങൾ ബന്ധം തുടർന്നു.

2008ൽ ​സ്​​പൈനൽ കോഡ്​ എന്ന ​നാടകം ചെയ്​തപ്പോൾ പ്രധാന വേഷം അനിലാണ്​ ചെയ്തത്​. തുടർന്നാണ്​ അനിലും പങ്കാളിയായി തൃശൂർ കേന്ദ്രീകരിച്ച്​ 'ഓക്​സിജൻ തിയറ്റർ കമ്പനി' വരുന്നത്​. 2011ൽ പിയർ ഗിൻറായി പ്രധാന വേഷത്തിൽ അനിൽ അഭിനയിച്ചു. ഇടക്കാലത്ത്​ ചാനലുകളിൽ അവതാരകനായി പോയ അനിലി​െൻറ രണ്ടാംവരവായിരുന്നു ആ കാലഘട്ടം. പിന്നീട്​ അഭിനയത്തി​െൻറ ഗൗരവ മേഖലയിലേക്ക്​ തിരിച്ചുവന്നു. ഈ കാലത്താണ്​ പതിയെ സിനിമയിലേക്ക്​ ചുവടുവെക്കുന്നത്​.

ഏറെ വൈകിയെങ്കിലും സിനിമക്കകത്ത്​ ശ്രദ്ധിക്കപ്പെടുന്ന വേഷങ്ങൾ ചെയ്യുന്ന സമയത്താണല്ലോ മരണം തിരിച്ചുവിളിച്ചത്​. ഒരു പക്ഷേ ഗോപി, നെടുമുടി വേണു, മുരളി എന്നിവരുടെ റേഞ്ചിൽ അഭിനയിക്കാൻ സാധ്യതയുള്ള നടനായിരുന്നു അനിൽ. അവതാരകനായി തിളങ്ങിനിൽക്കവേ കണ്ടപ്പോൾ അനിൽ പറഞ്ഞിരുന്നു: 'ഇതുകൊണ്ട്​ ഒരു കാര്യവുമില്ലെടാ... നമ്മൾ ​എന്തെങ്കിലും ചെയ്​ത്​ നിലനിൽക്കണ്ടേ എന്ന് ​വിചാരിച്ച്​ പോവുന്നതാണ്​.' ആ നിരാശ​ നാടകങ്ങളിൽ കൂടുതൽ സജീവമായാണ്​ മറികടന്നത്​. അന്ന്​ സിനിമ എന്നത്​ എത്തിപ്പിടിക്കാൻ കഴിയുന്നതിലുമപ്പുറത്തായിരുന്നു.'' -ദീപൻ ശിവരാമൻ പറഞ്ഞു.