മാനിനെ വേട്ടയാടിയയാൾക്ക്​ വന്യജീവി സംരക്ഷകനായി നിയമനം

തൃശൂർ: വനം വകുപ്പി​െൻറ നേതൃത്വത്തിൽ വന്യജീവി സംരക്ഷണ വാരം ആചരിക്കുമ്പോൾ, വന്യജീവി സംരക്ഷകനായി നിയമിച്ചിരിക്കുന്നത് മാനിനെ വേട്ടയാടിയ വ്യക്​തിയെ. തൃശൂർ വനം ഡിവിഷനിൽ പട്ടിക്കാട് റേഞ്ചിലാണ് സംഭവം. തൃശൂർ പാണഞ്ചേരി കരിപ്പാകുന്ന് സ്വദേശി തെങ്ങൻമൂച്ചി വീട്ടിൽ ദീപുവിനെയാണ്​ നിയമിച്ചിരിക്കുന്നത്. പീച്ചി വന്യജീവി സങ്കേതത്തിൽ കടന്നുകയറി മാനിനെ വേട്ടയാടിയ കേസിലെ പ്രതിയാണ് ഇയാൾ. റെസ്ക്യൂ വാച്ചറായി ശിപാർശ ചെയ്ത ഇയാൾക്ക്​ പാമ്പുകളെ പിടികൂടുന്നതിന് പരിശീലനവും വനത്തിൽ പ്രവേശിക്കുന്നതിനുള്ള ആധികാരിക രേഖയും നൽകി കഴിഞ്ഞു.

പട്ടിക്കാട് റേഞ്ചിൽ മേലുദ്യോഗസ്ഥ​െൻറ പ്രത്യേക താൽപര്യപ്രകാരമാണ് നിയമനം നടത്തിയതെന്നാണ് ആക്ഷേപം. ജീവനക്കാർ തന്നെ വകുപ്പ് മേധാവിക്ക് റിപ്പോർട്ട് ചെയ്തതിനെ തുടർന്ന്​ ഡെപ്യൂട്ടി റേഞ്ചറോട്​ വിശദീകരണം തേടിയിരുന്നു. എന്നാൽ, നേരത്തെ അത്തരമൊരു കേസിൽ ഉൾപ്പെട്ടിരുന്നുവെന്നും നിലവിൽ അങ്ങനെയില്ലെന്നും കാണിച്ച് റിപ്പോർട്ട് നൽകി. മാനിനെ വേട്ടയാടിയതിന്​ കോടതിയിൽ കേസുള്ള വിവരം പോലും മറച്ചുവെച്ചാണ്​ റിപ്പോർട്ട്​ നൽകിയിരിക്കുന്നത്​. കോടതിയിൽ കേസുള്ളതടക്കം വിവരം ഉൾക്കൊള്ളിച്ച്​ ഡിവിഷനൽ ഫോറസ്​റ്റ്​ ഓഫിസർക്കും ചീഫ് വൈൽഡ് ലൈഫ് വാർഡനുമുൾപ്പെടെ പരാതി നൽകിയിരു​െന്നങ്കിലും നടപടിയുണ്ടായിരുന്നില്ല. ഇതോടെ മുഖ്യമന്ത്രിക്കും പ്രിൻസിപ്പൽ ചീഫ് ഫോറസ്​റ്റ്​ കൺസർവേറ്റർക്കും അയച്ച പരാതിയിലാണ്​ അടിയന്തര വിശദീകരണം തേടിയത്. കുറ്റക്കാരല്ലെന്ന് കണ്ടെത്തുംവരെയെങ്കിലും ഇവരെ നടപടികളിൽ നിന്ന് വിലക്കണമെന്ന് ആവശ്യപ്പെട്ട് ഫോറസ്​റ്റ്​ സ്​റ്റാഫ് അസോസിയേഷനും കത്ത് നൽകിയിട്ടുണ്ട്.