അമൃതാനന്ദമയി മഠത്തിലെത്തിയ അമേരിക്കൻ പൗരന് മർദനം

കരുനാഗപ്പള്ളി: അമൃതാനന്ദമയി മഠത്തിലെത്തിയ അമേരിക്കൻ പൗരന് ക്രൂര മർദനം. ഇയാളെ അവശനിലയിൽ തിരുവനന്തപുരം മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു. മാരിയോ പോൾ (37) എന്നയാൾക്കാണ്​ മർദനമേറ്റത്​. ഇയാളുടെ കണ്ണ്​, നട്ടെല്ല്​, വൃക്ക, നെഞ്ച് തുടങ്ങിയവക്ക്​ ഗ​ുരുതര പരിക്കു​ണ്ട്​. അപകടാവസ്ഥ തരണം ചെയ്തിട്ടി​െല്ലന്ന്​ ആശുപത്രി അധികൃതർ പറഞ്ഞു.

മഠത്തിലും പരിസരത്തെ കടകളിലും അക്രമം കാട്ടിയതാണ് മർദനത്തിന്​ കാരണമെന്ന് പൊലീസ് പറയുന്നു. അക്രമം കാട്ടിയ യുവാവിനെ മഠത്തിലെ മറ്റ് അന്തേവാസികളും പുറത്തുള്ളവരും മർദിച്ച് കീഴടക്കി പൊലീസിനെ ഏൽപിക്കുകയായിരുന്നത്രേ. കലക്ടറുടെയും മറ്റ് ഉന്നത പൊലീസ് ഉദ്യോഗസ്ഥരുടെയും നിർദേശാനുസരണം പൊലീസ് യുവാവിനെ കരുനാഗപ്പള്ളി താലൂക്കാശുപത്രിയിലും പിന്നീട് തിരുവനന്തപുരം മെഡിക്കൽ കോളജ്​ ആശുപത്രിയിലും പ്രവേശിപ്പിച്ചു. അമൃതാനന്ദമയിയുടെ 64ാമത് ജന്മദിനാഘോഷത്തി​​െൻറ ഭാഗമായി മഠത്തിൽ ആഘോഷങ്ങൾ നടക്കുന്നതിനിടെ ശനിയാഴ്ച വൈകീട്ടാണ്​ സംഭവം.

രാഷ്​ട്രപതി രാംനാഥ്​ കോവിന്ദ് മഠത്തിൽ എത്തുന്നത്​ പ്രമാണിച്ച്​  കലക്​ടർ, ഇൻറലിജൻസ്​ വിഭാഗം ഉന്നത പൊലീസ് ഉദ്യോഗസ്ഥർ തുടങ്ങിയ മുഴുവൻ സുരക്ഷാ ഉദ്യോഗസ്ഥരും മഠത്തിലും പരിസരത്തുമുള്ളപ്പോഴാണ് സംഭവം. ഇയാൾ​ മ​േനാവിഭ്രാന്തിയുള്ള ആളാണെന്നും പ്രകോപനം കാട്ടി ആക്രമണമഴിച്ചുവിട്ടപ്പോൾ മറ്റുള്ളവർ പ്രതിരോധിക്കാൻ ശ്രമിക്കവെ  പരിക്കേറ്റതാണെന്നുമാണ് അധികൃതർ പറയുന്നത്​. മഠത്തിലും പുറത്തുമുള്ള ചിലർക്ക്​ യുവാവി​​െൻറ ആക്രമണത്തിൽ പരിക്കേറ്റിട്ടുണ്ട്​. 

അമൃതാനന്ദമയിയുടെ ജന്മദിനാഘോഷത്തിൽ പങ്കെടുക്കാനായി ഒരുമാസം മുമ്പാണ്​ മാരിയോ പോൾ അമേരിക്കയിൽനിന്ന്​ മഠത്തിലെത്തിയതെന്ന്​ അറിയുന്നു.  വ്യാപാര സ്ഥാപന ഉടമകളുടെ പരാതിയെ തുടർന്ന് യുവാവിനെതിരെയും വിദേശ പൗരനെ ആക്രമിച്ച് ബന്ദിയാക്കിയതിന്​ ആക്രമിച്ചവർക്കെതിരെയും കരുനാഗപ്പള്ളി പൊലീസ് കേസെടുത്തിട്ടുണ്ട്. 2012 ആഗസ്​റ്റ്​ നാലിന്​ അമൃതാനന്ദമയി മഠത്തിൽ സത്നംസിങ്​ എന്ന യുവാവിനെ ക്രൂരമായി മർദിച്ച് അവശനാക്കി ഇരുകൈകളും ബന്ധിച്ച്​ ഗുരുതരാവസ്ഥയിൽ പൊലീസിന് കൈമാറിയിരുന്നു.  ഇയാൾ പിന്നീട്​ ഊളമ്പാറ മ​േനാരോഗാശുപത്രിയിൽ മരിക്കാനിടയായത് വൻ വിവാദമായിരുന്നു.