ആലപ്പുഴ കലക്ടർ ഡോ. രേണുരാജും ശ്രീറാം വെങ്കിട്ടരാമനും വിവാഹിതരാകുന്നു

ആലപ്പുഴ: കലക്ടർ ഡോ. രേണുരാജും ആരോഗ്യവകുപ്പ് ജോയന്‍റ്​​ സെക്രട്ടറിയും കേരള മെഡിക്കല്‍ സര്‍വിസ് കോർപറേഷന്‍ എം.ഡിയുമായ ഡോ. ശ്രീറാം വെങ്കിട്ടരാമനും വിവാഹിതരാകുന്നു. അടുത്ത വ്യാഴാഴ്ച ചോറ്റാനിക്കര ക്ഷേ​ത്രത്തിലാണ്​ വിവാഹമെന്നാണ്​ വിവരം.

അടുത്തബന്ധുക്കളും സുഹൃത്തുക്കളും മാത്രം പങ്കെടുക്കും. എം.ബി.ബി.എസ്​ ബിരുദം പൂർത്തിയാക്കിയശേഷമാണ് ഇരുവരും സിവിൽ സർവിസിലെത്തുന്നത്. വിവാഹം കഴിക്കാനുള്ള തീരുമാനം ഐ.എ.എസ്​ സുഹൃത്തുക്കളെ വാട്സ്​ആപ്പിലൂടെയാണ് അറിയിച്ചത്​.

2012ൽ രണ്ടാം റാങ്കോടെ സിവിൽ സർവിസ്​ പാസായ ശ്രീറാം എറണാകുളം പനമ്പിള്ളി നഗർ സ്വദേശിയാണ്​. പത്തനംതിട്ട അസിസ്റ്റന്‍റ്​ കലക്ടർ, ദേവികുളം സബ് കലക്ടർ, സർവേ ആൻഡ് ലാൻഡ് ഡയറക്ടർ, തിരുവല്ല ആർ.ഡി.ഒ, പൊതുഭരണ വകുപ്പ് അസിസ്റ്റന്‍റ്​ സെക്രട്ടറി, കോവിഡ്​ ഡേറ്റ മാനേജ്മെന്‍റ്​ നോഡൽ ഓഫിസർ, ഇൻഫർമേഷൻ പബ്ലിക് റിലേഷൻസ് വകുപ്പിന്റെ ഫാക്ട്ചെക്ക് വിഭാഗം എന്നിവിടങ്ങളിൽ പ്രവർത്തിച്ചിട്ടുണ്ട്​. 2019ൽ കാറിടിച്ച്‌ മാധ്യമപ്രവര്‍ത്തകന്‍ കെ.എം. ബഷീര്‍ മരിച്ച കേസിലെ പ്രതിയായതോടെ ശ്രീറാമിനെ സർവിസിൽനിന്ന് സസ്പെൻഡ് ചെയ്തിരുന്നു. പിന്നീട് ദീർഘനാളുകൾക്കുശേഷമാണ് ആരോഗ്യവകുപ്പിലെത്തുന്നത്.

ചങ്ങനാശ്ശേരി മലകുന്നം സ്വദേശിനിയായ രേണുരാജ്​ രാജകുമാരൻ നായർ-ലത ദമ്പതികളുടെ മകളാണ്​.​ 2014ൽ രണ്ടാം റാങ്കോടെയാണ്​ ഐ.എ.എസ് പാസായത്. തൃശൂർ, ദേവികുളം എന്നിവിടങ്ങളിൽ സബ് കലക്ടറായി പ്രവർത്തിച്ചു. ചീഫ് സെക്രട്ടറിയുടെ സ്റ്റാഫ് ഓഫിസർ, കേന്ദ്ര പട്ടികവർ​ഗ മന്ത്രാലയം അസിസ്റ്റന്‍റ്​ സെക്രട്ടറി എന്നിങ്ങനെയും സേവനം അനുഷ്ഠിച്ചു.

നഗരകാര്യ വകുപ്പിന്റെയും അമൃത് മിഷന്റെയും ഡയറക്ടറായി പ്രവർത്തിക്കുമ്പോഴാണ്​ ആലപ്പുഴ കലക്ടറായി നിയമിതയായത്. ദേവികുളം സബ് കലക്ടറായിരുന്നപ്പോൾ കൈയേറ്റം ഒഴിപ്പിക്കലിലൂടെ ശ്രദ്ധനേടിയവരാണ് ഇരുവരും. സഹപാഠിയായ ഡോക്ടറുമായുള്ള വിവാഹബന്ധം രേണുരാജ് നേരത്തേ വേർപിരിഞ്ഞിരുന്നു. ശ്രീറാമിന്റെ ആദ്യവിവാഹമാണ്​.