'ക്രിമിനല്‍ പ്രവര്‍ത്തിയിലൂടെ തട്ടിയെടുത്ത ഭൂമി, പാർട്ടി വാങ്ങരുത്'; എ.കെ.ജി സെന്‍റർ ഭൂമി തര്‍ക്കസ്​ഥലമെന്ന് അറിയിച്ച് സി.പി.എമ്മിന്​ നൽകിയ കത്ത് പുറത്ത്

തിരുവനന്തപുരം: സി.പി.എം സംസ്ഥാന കമ്മിറ്റി ഓഫിസായ പുതിയ എ.കെ.ജി സെന്‍ററിന് സ്ഥലം വാങ്ങിയത് തര്‍ക്കഭൂമിയെന്ന് അറിഞ്ഞാ​ണെന്നതിന്‍റെ തെളിവ്​ പുറത്ത്​.

രജിസ്​ട്രേഷന്​ മുമ്പ്​ തര്‍ക്ക ഭൂമിയാണിതെന്ന്​ വ്യക്തമാക്കി പാർട്ടിക്ക്​ നൽകിയ കത്താണ്​ പുറത്തുവന്നത്​. വി.എസ്.എസ്.​സിയിലെ ശാസ്ത്രജ്ഞ ഇന്ദു ഗോപന്‍ 2020 ജൂണ്‍ ഒമ്പതിന്​ അന്നത്തെ സംസ്ഥാന സെക്രട്ടറി കോടിയേരി ബാലകൃഷ്ണന് നൽകിയ കത്താണ്​ ഭൂമി തർക്കവുമായി ബന്ധപ്പെട്ട സുപ്രീം കോടതി കേസിനിടെ പരസ്യമായത്​.

‘തങ്ങളുടെ കൈവശമുണ്ടായിരുന്ന ഭൂമി ക്രിമിനല്‍ പ്രവര്‍ത്തിയിലൂടെ തട്ടിയെടുത്ത്​ സി.പി.എമ്മിന് വില്‍ക്കാന്‍ ശ്രമിക്കുകയാണ്. അത് പാര്‍ട്ടി വാങ്ങിയാല്‍ ഭൂമിയുടെ ഉടമസ്ഥാവകാശം സംബന്ധിച്ച് ദീര്‍ഘകാലം നീളുന്ന നിയമപോരാട്ടമുണ്ടായേക്കാം. അതിനാൽ ഈ ഭൂമി വാങ്ങുന്നതില്‍ നിന്ന് പാര്‍ട്ടി വിട്ടുനില്‍ക്കണം’ എന്നാണ് ഇന്ദു കത്തില്‍ പറഞ്ഞിരുന്നത്.

എ.കെ.ജി സെന്‍റർ നിലകൊള്ളുന്ന ഭൂമിയുടെ ആദ്യ ഉടമ പോത്തന്‍ കുടുംബമായിരുന്നു. അവര്‍ ഫിനാന്‍സ് ആന്‍ഡ് ഇന്‍വെസ്റ്റ്‌മെന്റ് കോര്‍പറേഷനില്‍ നിന്നെടുത്ത വായ്പയുടെ തിരിച്ചടവ് മുടങ്ങിയതോടെ ജപ്തി നടപടിയുണ്ടായി. ഇതിനിടെ, ഈ ഭൂമി ഇന്ദുവും അവരുടെ ബന്ധുവും ചേര്‍ന്ന് വാങ്ങി.

ആ വേളയിലാണ്​ കോടതി വസ്തു ലേലം ചെയ്തത്​ എന്നാണ്​ ആക്ഷേപം. തനിക്കവകാശപ്പെട്ട സ്ഥലം ലേലം ചെയ്തത്​ നടപടിക്രമങ്ങള്‍ പാലിക്കാതെയാണെന്ന്​ ചൂണ്ടിക്കാട്ടിയാണ്​ ഇന്ദു സുപ്രീം കോടതിയെ സമീപിച്ചത്​. 1998 ല്‍ കോടതി ലേലത്തില്‍ ഭൂമി കരസ്ഥമാക്കിയവരില്‍ നിന്നാണ് 2021ല്‍ 32 സെന്‍റ് ഭൂമി ആറരക്കോടിയോളം രൂപക്ക്​ സി.പി.എം വാങ്ങിയത്. ഭൂമി തർക്കത്തിൽ സുപ്രീം കോടതി നോട്ടീസ കഴിഞ്ഞ ദിവസമാണ്​ സി.പി.എമ്മിന്​ ലഭിച്ചത്​.