എസ്.എഫ്.ഐയിൽ സംഘ്​പരിവാർ മനസ്സുള്ളവർ, നേതൃത്വം നടപടിയെടുക്കണം -എ.ഐ.എസ്.എഫ്

കോട്ടയം: സംഘ്​പരിവാർ മനസ്സുള്ള പ്രവര്‍ത്തകരെ കണ്ടെത്തി നടപടിയെടുക്കാന്‍ എസ്.എഫ്.ഐ നേതൃത്വം തയാറാവണമെന്ന്​ എ.ഐ.എസ്.എഫ് സംസ്​ഥാന പ്രസിഡൻറ്​ എ.കബീര്‍. എസ്​.എഫ്​.ഐ എറണാകുളം, ഇടുക്കി ജില്ല നേതൃത്വത്തി​െൻറയും സംസ്ഥാന സഹഭാരവാഹികളുടെയും നേതൃത്വത്തിലാണ് കഴിഞ്ഞ ദിവസം കോട്ടയത്ത്​ എ.ഐ.എസ്.എഫ് പ്രവര്‍ത്തകരെ ആക്രമിച്ചത്​. പൊതുവിദ്യാഭ്യാസമന്ത്രി വി.ശിവന്‍കുട്ടിയുടെ പേഴ്​സനൽസ്​റ്റാഫ് ​അംഗമായ അരുണും സ്​ഥലത്തുണ്ടായിരുന്നു. ഇക്കാര്യം പരിശോധിച്ച് നടപടിയെടുക്കാന്‍ എസ്.എഫ്.ഐ നേതൃത്വം തയാറാവണമെന്ന്​ അദ്ദേഹം വാർത്തസമ്മേളനത്തിൽ ആവശ്യപ്പെട്ട​ു.

എം.ജി സർവകലാശാല സെനറ്റ് തെര‍ഞ്ഞെടുപ്പില്‍ ജനാധിപത്യപരമായി മത്സരിക്കാനാണ് എ.ഐ.എസ്.എഫ് ശ്രമിച്ചത്. തെരഞ്ഞെടുപ്പിനുമുമ്പ്​ മുന്നണിയായി മത്സരിക്കാന്‍ തയാറാണെന്നും സെനറ്റിലേക്ക് മാത്രമാകും തങ്ങള്‍ക്ക് സ്ഥാനാർഥി ഉണ്ടാവുകയെന്നും എസ്.എഫ്.ഐ നേതാക്കളെ അറിയിച്ചിരുന്നു. എന്നാല്‍, എസ്.എഫ്.ഐ താല്‍പര്യം കാട്ടുകയോ ചര്‍ച്ചക്ക്​ തയാറാവുകയോ ചെയ്തില്ല. ഇതോടെ എ.ഐ.എസ്.എഫ് സ്വന്തം നിലയിൽ മത്സരിക്കുകയായിരുന്നു. സംഘപരിവാറിനെതിരെ ഇടതുസംഘടനകൾ ഐക്യത്തോടെ പ്രവർത്തിച്ചുവരികയാണ്​. ഇതിനുവിരുദ്ധമായി കോട്ടയത്ത് എ.ഐ.എസ്.എഫ് നേതാക്കളെ തിരഞ്ഞുപിടിച്ച് ആക്രമിക്കുന്ന സമീപനമാണ് എസ്.എഫ്.ഐയുടെ ഭാഗത്തുനിന്നും ഉണ്ടാകുന്നത്.

ഇത്തരം അരാഷ്​ട്രീയ ക്രിമിനല്‍സംഘത്തെ സംരക്ഷിക്കുന്ന നിലപാടില്‍നിന്നും എസ്.എഫ്.ഐ പിൻമാറണമെന്നും അദ്ദേഹം ആവശ്യപ്പെട്ടു. കോട്ടയം ജില്ല പ്രസിഡൻറ്​ എസ്.ഷാജോ, സെക്രട്ടറി നന്ദു ജോസഫ് എന്നിവരും വാര്‍ത്ത സമ്മേളനത്തില്‍ പങ്കെടുത്തു.