മൊറട്ടോറിയം കാലാവധി നീട്ടിയ തീരുമാനം തട്ടിപ്പ് -മുല്ലപ്പള്ളി

തിരുവനന്തപുരം: കാര്‍ഷിക വായ്പകളുടെ മൊറട്ടോറിയം ഡിസംബര്‍ 31വരെ നീട്ടിയ മന്ത്രിസഭ തീരുമാനം തട്ടിപ്പാണെന്ന് ക െ.പി.സി.സി പ്രസിഡൻറ്​ മുല്ലപ്പള്ളി രാമചന്ദ്രന്‍. പ്രഖ്യാപനം കര്‍ഷകര്‍ക്ക് ഗുണം ചെയ്യില്ല. നിലവിലെ മൊറട്ടോറിയ ം നിലനില്‍ക്കെയാണ് ബാങ്കുകള്‍ ജപ്തി നടപടികള്‍ തുടരുന്നത്​.

2018 ഒക്ടോബര്‍ മുതല്‍ 2019 ഒക്ടോബര്‍ വരെ പ്രഖ്യാപിച്ച മൊറട്ടോറിയം രണ്ടുമാസത്തേക്ക് കൂടി നീട്ടുക മാത്രമാണ് സര്‍ക്കാര്‍ ചെയ്തത്. കാലാവധി കഴിഞ്ഞാല്‍ ഓരോ കര്‍ഷകനും പലിശയും പിഴപ്പലിശയും ചേര്‍ത്ത് തുക തിരിച്ച​ടയ്​ക്കേണ്ട സ്ഥിതി നിലനില്‍ക്കുന്നു.

രണ്ടുമാസത്തിനുള്ളില്‍ ഇടുക്കിയില്‍ എട്ട് കര്‍ഷകരാണ് ആത്മഹത്യ ചെയ്തത്. 1.25 ലക്ഷം കര്‍ഷകര്‍ ബാങ്ക്​ നടപടികളുടെ ഭീഷണിയിലാണ്. കടക്കെണിയില്‍പെട്ട് ആത്മഹത്യ ചെയ്ത കര്‍ഷകരുടെ കുടുംബങ്ങള്‍ക്ക് അടിയന്തര ധനസഹായം നല്‍കാൻ സര്‍ക്കാര്‍ തയാറാകണം. പ്രകൃതിക്ഷോഭം മൂലമുള്ള വിളനാശത്തിന് നഷ്​ടപരിഹാരം നല്‍കാൻ സര്‍ക്കാര്‍ പ്രഖ്യാപിച്ച 85 കോടി പര്യാപ്തമല്ലെന്നും അദ്ദേഹം പ്രസ്​താവിച്ചു.