ഉദ്യോഗസ്ഥനെ ബാറ്റുകൊണ്ടടിച്ച എം.എൽ.എക്കെതിരെ നടപടിക്കൊരുങ്ങി ബി.ജെ.പി

ന്യൂഡൽഹി: അനധികൃത കൈയേറ്റങ്ങൾക്കെതിരെ നടപടിയെടുക്കാനെത്തിയ മുനിസിപ്പൽ കോർപ്പറേഷൻ ഉദ്യോഗസ്ഥനെ ബാറ്റ്​ കൊണ്ട്​ അടിച്ച ബി.ജെ.പി എം.എൽ.എ ആകാശ്​ വിജയവർഗിയക്കെതിരെ നടപടിക്കൊരുങ്ങി ബി.ജെ.പി. പ്രധാനമന്ത്രി നരേന്ദ്ര മോദി എം.എൽ.എക്കെതിരെ നിശിത വിമർശനമുയർത്തിയതോടെയാണ്​ പാർട്ടി നടപടിക്കൊരുങ്ങുന്നത്​.

സംഭവത്തിൽ ആകാശിന്​ കാരണം കാണിക്കൽ നോട്ടീസ്​ നൽകാൻ പാർട്ടി തീരുമാനിച്ചു. പെ​ട്ടെന്ന്​ അച്ചടക്ക നടപടി കൈക്കൊള്ളുന്നതിന്​ മുമ്പ്​ ആകാശ്​ വിജയ വർഗിയയുടെ വിശദീകരണത്തിന്​ കാത്തിരിക്കുകയാണ്​ ബി.ജെ.പി യെന്ന്​ പാർട്ടി വൃത്തങ്ങൾ അറിയിച്ചു.

കുറ്റം ചെയ്തയാൾ ആരുെട മകനാണെന്ന് നോക്കേണ്ടതി​ല്ലെന്നും സർക്കാർ ഉദ്യോഗസ്ഥരെ ആക്രമിക്കുന്ന സ്വഭാവം അംഗീകരിക്കാനാവില്ലെന്നും ഇത്തരം പെരുമാറ്റരീതിയെ ആരും പ്രോത്സാഹിപ്പിക്കരുതെന്നും നരേ​ന്ദ്ര മോദി ബി.ജെ.പി പാർലമെന്‍ററി പാർട്ടി യോഗത്തിൽ വ്യക്തമാക്കിയിരുന്നു.

ബി.​ജെ.​പി ദേ​ശീ​യ ജ​ന​റ​ല്‍ സെ​ക്ര​ട്ട​റി കൈ​ലാ​ശ് വി​ജ​യ് വ​ര്‍ഗി​യ​യു​ടെ മ​ക​നാണ്​ ആകാശ്​. പട്ടാപ്പകൽ പൊതുജന മധ്യത്തിൽ ആകാശ്​ വിജയ വർഗിയ ഉദ്യോഗസ്ഥനെ മർദിക്കുന്ന ദൃശ്യങ്ങൾ സമൂഹ മാധ്യമങ്ങളിൽ ​പ്രചരിച്ചിരുന്നു​.