ആദിവാസി വിദ്യാർഥിനികൾക്ക്​ പീഡനം: പ്രതികൾ കസ്​റ്റഡിയിലെന്ന്​ സൂചന

മാനന്തവാടി: ആദിവാസി വിദ്യാർഥിനികളെ ഊട്ടിയിലെ ആഡംബര ഹോട്ടലിലെത്തിച്ച് പീഡിപ്പിച്ച സംഭവത്തിൽ പ്രതികൾ പൊലീസ് കസ്​റ്റഡിയിലായതായി സൂചന. കോഴിക്കോട്​ നാദാപുരം സ്വദേശികളായ 30, 24 വയസ്സുള്ള യുവാക്കളാണ് പ്രതികളെന്ന് സ്ഥിരീകരിച്ചിട്ടുണ്ട്. ഇവർ ഉപയോഗിച്ച മൊബൈൽ ഫോൺ കേന്ദ്രീകരിച്ച് നടത്തിയ അന്വേഷണത്തിൽ കർണാടകയിൽനിന്ന്​ കണ്ണൂരിൽ എത്തിയതായി മനസ്സിലായതോടെ കണ്ണൂർ പൊലീസി​​​െൻറ സഹായം തേടുകയായിരുന്നു.

പ്രതികളെന്ന് കരുതുന്നവരുടെ ഫോട്ടോ ഇരകളായ പെൺകുട്ടികൾ തിരിച്ചറിഞ്ഞു. മാനന്തവാടി സ്​പെഷൽ മൊബൈൽ സ്​ക്വാഡ്​ ഡിവൈ.എസ്.പി കുബേരൻ നമ്പൂതിരിയുടെ നേതൃത്വത്തിലാണ് കേസന്വേഷിക്കുന്നത്. മാനന്തവാടി നഗരസഭക്ക് കീഴിലെ ഗ്രാമപ്രദേശത്തെ 17, 14 വയസ്സുള്ള കുട്ടികളാണ്​ പീഡനത്തിനിരയായത്. പ്ലസ് വണ്‍ വിദ്യാർഥിനിയായ 17കാരി പീഡനത്തിനിരയായെന്ന്​ വൈദ്യപരിശോധനയിൽ സ്ഥിരീകരിച്ചു.

ഏഴാം ക്ലാസ് വിദ്യാർഥിനിയായ 14കാരിയെ പീഡിപ്പിക്കാന്‍ ശ്രമിച്ചതായും പരാതിയുണ്ട്​. കുട്ടികളുടെ മൊഴിയുടെ അടിസ്ഥാനത്തില്‍ പീഡനം, പീഡനശ്രമം, കുട്ടികൾക്കെതിരായ അതിക്രമം തടയൽ നിയമം, പട്ടികജാതി- വർഗ അതിക്രമം തടയൽ നിയമം തുടങ്ങിയവ പ്രകാരമാണ്​ കേസ് രജിസ്​റ്റര്‍ ചെയ്​തത്​​.

30കാരന്‍ 17കാരിയുമായി മൊബൈല്‍ വഴി അടുത്തശേഷമാണ് കുട്ടിയുടെ ബന്ധുവായ 14കാരിയെ ത​​​െൻറ കൂട്ടുകാരനായ 24കാരന് പരിചയപ്പെടുത്തിയത്​. ജൂണ്‍ 16ന് കുട്ടികളുടെ താമസസ്​ഥലത്തെത്തിയ യുവാക്കള്‍ കാറില്‍ കയറ്റി ഊട്ടിയിലേക്ക് കൊണ്ടുപോകുകയായിരുന്നു. ലോഡ്ജില്‍ മുറിയെടുത്ത്​ പീഡിപ്പിച്ചശേഷം പിറ്റേന്ന്​ ഇരുവരേയും ബത്തേരിയില്‍ തിരികെ കൊണ്ടുവിട്ടു.