മർദനക്കേസ്​: എ.ഡി.ജി.പിയുടെ മകളും ഹൈകോടതിയിലേക്ക്​

കൊച്ചി: പൊലീസ് ഡ്രൈവർ ഗവാസ്‌കറിനെ മർദിച്ച കേസിൽ മുൻകൂർ ജാമ്യം തേടി എ.ഡി.ജി.പിയുടെ മകളും ഹൈകോടതിയെ സമീപിക്കാനൊരുങ്ങുന്നു. മകൾക്ക്​ വേണ്ടി ഹരജി നൽകുന്നതിനെക്കുറിച്ച്​ ആലോചിക്കാൻ എ.ഡി.ജി.പി സുദേഷ് കുമാർ കുടുംബസമേതം വെള്ളിയാഴ്​ച രാവിലെ കൊച്ചിയിലെത്തി അഭിഭാഷകരുമായി ചർച്ച നടത്തി. ഒരു മണിക്കൂറോളം അഭിഭാഷക​​െൻറ ഒാഫിസിൽ ചെലവഴിച്ച ശേഷമാണ്​ എ.ഡി.ജി.പിയും ഭാര്യയും മകളും മടങ്ങിയത്.

വെള്ളിയാഴ്​ചതന്നെ നൽകാൻ ഹരജി തയാറാക്കിയെങ്കിലും അവസാന നിമിഷം ഇത്​ മാറ്റുകയായിരുന്നു. അടുത്തദിവസം ഹരജി നൽകുമെന്നാണ് സൂചന. എ.ഡി.ജി.പിയുടെ മകൾ നൽകിയ വ്യാജ പരാതിയിൽ തനിക്കെതിരെ മ്യൂസിയം പൊലീസ്​ രജിസ്​റ്റർ ചെയ്​ത കേസ്​ റദ്ദാക്കണമെന്ന ഗവാസ്​കറി​​െൻറ ഹരജിയിൽ അറസ്​റ്റ്​ ജൂലൈ നാലുവരെ തടഞ്ഞിട്ടുണ്ട്.