പ്രവേശന പരീക്ഷ മാർക്കിനൊപ്പം പ്ലസ് ടു മാർക്ക് ചേർക്കൽ: ഹരജി ഹൈ​േകാടതി തള്ളി

കൊച്ചി: പ്രവേശന പരീക്ഷകൾക്കൊപ്പം ഇത്തവണ പ്ലസ് ടു പരീക്ഷയുടെ മാർക്ക് പരിഗണിക്കരുതെന്ന്​ ആവശ്യപ്പെടുന്ന ഹരജികൾ ഹൈകോടതി തള്ളി. സി.ബി.എസ്.ഇ സ്കൂൾ മാനേജ്മെൻറ്​ അസോസിയേഷൻ ഉൾപ്പെടെ നൽകിയ ഹരജികളാണ് കോടതി പരിഗണിച്ചത്. അതേസമയം, സുപ്രീംകോടതി അനുവദിച്ച ഇംപ്രൂവ്മെൻറ്​ പരീക്ഷയെഴുതിയ കുട്ടികൾക്ക് ഫലപ്രഖ്യാപനം വരുന്ന മുറക്ക്​ മാർക്ക് വെബ്സൈറ്റിൽ അപ്‌ലോഡ് ചെയ്യാൻ സമയം നീട്ടിനൽകണമെന്ന് എൻട്രൻസ് കമീഷണർക്ക് സിംഗിൾ ബെഞ്ച് നിർദേശം നൽകി.

സംസ്ഥാന സിലബസിൽ ഇത്തവണ പ്ലസ് ടു പരീക്ഷ നടത്തിയിരുന്നെങ്കിലും കോവിഡ് വ്യാപനത്തെത്തുടർന്ന് സി.ബി.എസ്.ഇ, ഐ.സി.എസ്.ഇ സിലബസുകളിൽ പരീക്ഷ നടത്തിയില്ലെന്ന് ഹരജിയിൽ പറയുന്നു. അതിനാൽ എൻജിനീയറിങ്​ പ്രവേശനത്തിന് എൻട്രൻസ് പരീക്ഷയുടെ മാർക്കിനൊപ്പം പ്ലസ് ടുവി​െൻറ മാർക്ക് പരിഗണിക്കരുതെന്നായിരുന്നു ഹരജിക്കാരുടെ ആവശ്യം. എന്നാൽ, സി.ബി.എസ്.ഇ, ഐ.സി.എസ്.ഇ സിലബസുകളിൽ പരീക്ഷ നടത്തിയില്ലെങ്കിലും സുപ്രീംകോടതി അംഗീകരിച്ച ഒരു സ്കീം പ്രകാരം ഫലപ്രഖ്യാപനം നടത്തിയിരുന്നെന്നും ഇൗ മാർക്ക് എൻജിനീയറിങ്​ പ്രവേശനത്തിനുവേണ്ടി പരിഗണിക്കുന്നതിൽ തെറ്റില്ലെന്നും സർക്കാർ വാദിച്ചു. ഇൗ വാദം അംഗീകരിച്ചാണ് സിംഗിൾ ബെഞ്ച് ഹരജികൾ തള്ളിയത്.

സി.ബി.എസ്.ഇ-ഐ.സി.എസ്.ഇ സിലബസുകളിൽ 10ാം ക്ലാസിലെയും 11ാം ക്ലാസിലെയും മാർക്കുകൾകൂടി പരിഗണിച്ച് ഫലപ്രഖ്യാപനം നടത്താനുള്ള സ്കീമിനാണ് സുപ്രീംകോടതി അനുമതി നൽകിയത്. ഇൗ ഫലം തൃപ്തികരമല്ലെന്ന് തോന്നുന്ന കുട്ടികൾക്ക് ഇംപ്രൂവ്മെൻറ്​ പരീക്ഷ എഴുതാനും സുപ്രീംകോടതി അനുമതി നൽകിയിരുന്നു. സി.ബി.എസ്.ഇ സിലബസിലും ഐ.സി.എസ്.ഇ സിലബസിലും ഇംപ്രൂവ്മെൻറ്​ പരീക്ഷയുടെ ഫലം പ്രഖ്യാപിച്ചിട്ടില്ല. എന്നാൽ, എൻജിനീയറിങ്​ പ്രവേശനത്തിന് വെബ്സൈറ്റിൽ പ്ലസ് ടുവി​െൻറ മാർക്ക് അപ്‌ലോഡ് ചെയ്യാനുള്ള സമയം ഈ മാസം 17ന് അവസാനിച്ചു. ഇക്കാര്യം ചൂണ്ടിക്കാട്ടി സമയം നീട്ടിനൽകണമെന്ന് ഹരജിക്കാരിൽ ചിലർ ആവശ്യപ്പെട്ടു.

തുടർന്നാണ് ഇംപ്രൂവ്മെൻറ്​ പരീക്ഷയെഴുതി ഫലം കാത്തിരിക്കുന്ന കുട്ടികൾക്ക് റിസൽറ്റ്​ വരുന്ന മുറക്ക്​ മാർക്ക് വെബ്സൈറ്റിൽ അപ്‌ലോഡ് ചെയ്യാൻ കഴിയുന്ന വിധത്തിൽ സമയം നീട്ടിനൽകണമെന്ന് സിംഗിൾ ബെഞ്ച് എൻട്രൻസ് കമീഷണർക്ക് നിർദേശം നൽകിയത്. മാർക്ക് അപ്‌ലോഡ് ചെയ്യാനുള്ള സമയം നീട്ടി നൽകാമോയെന്ന് നേര​േത്ത സർക്കാറിനോട് ആരാഞ്ഞെങ്കിലും പ്രവേശന നടപടികൾ പൂർത്തിയാക്കാൻ എ.ഐ.സി.ടി.ഇ അനുവദിച്ച സമയം നീട്ടിനൽകിയാൽ ഇത്​ പരിഗണിക്കാമെന്ന് സർക്കാർ മറുപടി നൽകിയിരുന്നു. എന്നാൽ, പ്രവേശനത്തിനുള്ള സമയം നീട്ടാനാവില്ലെന്ന് എ.ഐ.സി.ടി.ഇ വ്യക്തമാക്കി. തുടർന്നാണ് ഹൈ​േകാടതി എൻട്രൻസ് കമീഷണർക്ക് നിർദേശം നൽകിയത്.