ഫിസിയോ, ഒക്കുപേഷനൽ തെറാപ്പിസ്റ്റുകൾ ‘ഡോക്ടർ’ ചേർക്കുന്നത് നിയമപരമല്ല -ഹൈകോടതി

കൊച്ചി: അംഗീകൃത മെഡിക്കൽ ബിരുദധാരിയല്ലാത്ത ഫിസിയോ, ഒക്കുപേഷനൽ തെറാപ്പിസ്റ്റുകൾ പേരിന് മുന്നിൽ ‘ഡോക്ടർ’ ചേർക്കുന്നത് പ്രഥമദൃഷ്ട്യാ നിയമപരമല്ലെന്ന് ഹൈകോടതി. ഇവർ അനാവശ്യമായി ‘ഡോക്ടർ’ എന്ന വാക്ക്​ ഉപയോഗിക്കുന്നില്ലെന്ന് അധികൃതർ ഉറപ്പുവരുത്തണമെന്നും ജസ്റ്റിസ് വി.ജി. അരുൺ നിർദേശിച്ചു.

നാഷനൽ മെഡിക്കൽ കമീഷനടക്കം എതിർകക്ഷികൾക്ക്​ നോട്ടീസ്​ ഉത്തരവായ കോടതി ഹരജി വീണ്ടും ഡിസംബർ ഒന്നിന് പരിഗണിക്കാൻ മാറ്റി.

തെറാപ്പിസ്റ്റുകൾ ‘ഡോക്ടർ’ എന്ന് ചേർക്കുന്നത് തടയണമെന്നാവശ്യപ്പെട്ട് സ്പെഷലിസ്റ്റ് മെഡിക്കൽ ഡോക്ടർമാരുടെ സംഘടനയായ ഇന്ത്യൻ അസോസിയേഷൻ ഒഫ് ഫിസിക്കൽ മെഡിസിൻ ആൻഡ്​​ റിഹാബിലിറ്റേഷൻ നൽകിയ ഹരജിയാണ്​ കോടതിയുടെ പരിഗണനയിലുള്ളത്​.