മരണത്തിൽ ദുരൂഹത: പത്ത്​ വർഷം മുമ്പ്​ മരിച്ച വിദ്യാർഥിയുടെ മൃതദേഹം വീണ്ടും പോസ്​റ്റു​മോർട്ടം ചെയ്യും

തിരുവനന്തപുരം: പത്ത് വർഷംമുമ്പ് ദുരൂഹസാഹചര്യത്തിൽ മരിച്ച വിദ്യാർഥിയുടെ മൃതദേഹം പുറത്തെടുത്ത്​ വീണ്ടും പോസ ്​റ്റു​മോര്‍ട്ടം ചെയ്യാന്‍ തീരുമാനം. ഭരതന്നൂര്‍ രാമരശേരി വിജയവിലാസത്തില്‍ വിജയകുമാറി​​െൻറ മകനും ഭരതന്നൂര്‍ ഗവ. എച്ച്.എസ്.എസിലെ ഏഴാംക്ലാസ് വിദ്യാർഥിയുമായിരുന്ന ആദര്‍ശ് വിജയനാണ്​ 13ാം വയസ്സില്‍ ദുരൂഹസാഹചര്യത്തില്‍ മരിച്ചത്​. കൊലപാതകമെന്ന്​ കണ്ടെത്തിയിട്ടും പ്രതിയെ പിടികൂടാൻ കഴിഞ്ഞിരുന്നില്ല. കൂടത്തായി കൂട്ടമരണം തെളിയിക്കപ്പെട്ട സാഹചര്യത്തിലാണ്​ ശാസ്​ത്രീയ പരിശോധനക്കായി വീട്ടുവളപ്പില്‍ സംസ്‌കരിച്ച മൃതദേഹം വീണ്ടും പുറത്തെടുക്കാൻ ക്രൈംബ്രാഞ്ച് തീരുമാനിച്ചത്. പോസ്​റ്റു​മോർട്ടം തിങ്കളാഴ്ച നടത്തുമെന്നാണ് വിവരം.

2009 ഏപ്രില്‍ നാലിന്​ വൈകീട്ട് മൂന്നിന്​ കടയിലേക്കുപോയ ആദര്‍ശിനെ കാണാതാകുകയായിരുന്നു. തിരച്ചിലില്‍ വീട്ടില്‍നിന്ന്​ അകലെയുള്ള വയലിലെ കുളത്തില്‍ മൃതദേഹം കണ്ടെത്തി. അപകടമരണമെന്ന നിലയിലായിരുന്നു ആദ്യം പൊലീസ്​ അന്വേഷണം നീങ്ങിയത്​. എന്നാല്‍, മരണത്തില്‍ ദുരൂഹതയുണ്ടെന്ന് ബന്ധുക്കള്‍ ആരോപിക്കുകയും നാട്ടുകാര്‍ ആക്​ഷന്‍ കൗണ്‍സില്‍ രൂപവത്കരിക്കുകയും ചെയ്​ത് മുഖ്യമന്ത്രിക്കും ബന്ധപ്പെട്ട വകുപ്പുകള്‍ക്കും പരാതി നല്‍കി. തുടർന്ന്​, അന്വേഷണം ക്രൈംബ്രാഞ്ചിനു കൈമാറി​.

തലക്കും നട്ടെല്ലിനുമേറ്റ പരിക്ക് മരണകാരണമായെന്നായിരുന്നു പോസ്​റ്റുമോര്‍ട്ടം റിപ്പോര്‍ട്ടിൽ. വെള്ളം കുടിച്ചല്ല കുട്ടി മരിച്ചതെന്നും തലക്കേറ്റ ക്ഷതമാണ്​ മരണകാരണമെന്നും രേഖപ്പെടുത്തിയിരുന്നു. തുടര്‍ന്ന്, സംഭവം നടന്ന കുളം അന്വേഷണസംഘം വെള്ളംവറ്റിച്ചു പരിശോധിച്ചെങ്കിലും തലക്കു ക്ഷതമേല്‍ക്കുന്ന കല്ലുപോലുള്ള ഒന്നും കണ്ടെത്താനായില്ല. എന്നാല്‍, കുളത്തില്‍നിന്ന്​ ഒരു കുറുവടി ലഭിച്ചു. ഇതോടെ കൊലപാതകമെന്ന സംശയം ബലപ്പെട്ടു. വീണ്ടും ശാസ്​ത്രീയ പരിശോധനക്കായാണ്​ മൃതദേഹം പുറത്തെടുത്ത്​ പോസ്​റ്റു​മോർട്ടം നടത്തുന്നത്​.