സാമ്പത്തിക പ്രയാസം വന്നപ്പോൾ ചെയ്തതാണ്, ഇനി റമ്മി പരസ്യത്തിനില്ല -ലാൽ

കൊച്ചി: ഓൺലൈൻ റമ്മി പരസ്യത്തിൽ അഭിനയിച്ചതിൽ ഖേദം പ്രകടിപ്പിച്ച് നടൻ ലാൽ. കോവിഡ് സമയത്ത് സാമ്പത്തിക പ്രശ്നം വന്നപ്പോൾ അഭിനയിച്ചതാണെന്ന് അദ്ദേഹം പറഞ്ഞു. ഇനി ഇത്തരം പരസ്യങ്ങളിൽ അഭിനയിക്കില്ലെന്നും അദ്ദേഹം പറഞ്ഞു. റമ്മി പരസ്യത്തിൽ അഭിനയിക്കുന്നതിൽനിന്ന് നടൻമാരും നടിമാരും പിൻമാറണമെന്ന് ഗണേഷ്കുമാർ എം.എൽ.എ കഴിഞ്ഞ ദിവസം ആവശ്യപ്പെട്ടിരുന്നു. സർക്കാർ വിഷയത്തിൽ ഇടപെടണമെന്നും അദ്ദേഹം ആവശ്യപ്പെട്ടിരുന്നു. രാജ്യദ്രോഹപരസ്യങ്ങളിൽനിന്നും താരങ്ങൾ പിൻമാറണമെന്നാണ് ഗണേഷ് കുമാർ നിയമസഭയിൽ ആവശ്യപ്പെട്ടത്. ഇതിന് പിന്നാലെയാണ് ലാൽ ഖേദപ്രകടനവുമായി എത്തിയത്.

കോവിഡിന്റെ കാലത്ത് ഒരുപാട് സാമ്പത്തിക പ്രശ്നങ്ങളുണ്ടായിരുന്ന സമയത്ത് വന്ന പരസ്യമായിരുന്നു. തിരിച്ചും മറിച്ചും കുറേ ആലോചിച്ചു. ​ഗവൺമെന്റ് അനുമതിയോടുകൂടി ചെയ്യുന്നതാണെന്ന് കേട്ടപ്പോൾ അഭിനയിച്ചതാണ്. പക്ഷേ അത് ഇത്രയും വലിയ പ്രശ്നങ്ങളുണ്ടാക്കുമെന്നോ ആത്മഹത്യയുണ്ടാക്കുമോ എന്നൊന്നും കരുതിയില്ല. ഇനി ഇത്തരം പരസ്യങ്ങളിൽ തലവെക്കില്ല. റമ്മിയുടെ പരസ്യത്തിൽ അഭിനയിച്ചതിൽ സങ്കടമുണ്ട്. ലാൽ പറഞ്ഞു.