നഗ്​നവിഡിയോ: ആലപ്പുഴ സി.പി.എമ്മിൽ വീണ്ടും നടപടി, ഏരിയ കമ്മിറ്റി അംഗത്തെ തരംതാഴ്ത്തി

ആലപ്പുഴ: നഗ്​നദൃശ്യവിഡിയോ വിവാദത്തിൽ ആലപ്പുഴ സി.പി.എമ്മിൽ വീണ്ടും നടപടി. ഫോണിൽ അശ്ലീല ദൃശ്യങ്ങൾ പകർത്തി സൂക്ഷിച്ച എ.പി. സോണക്കെതിരെ പരാതി നൽകിയവരെ ഭീഷണിപ്പെടുത്തിയ സംഭവത്തിൽ ആലപ്പുഴ സൗത്ത്​ ഏരിയ കമ്മിറ്റി അംഗം എ.ഡി. ജയനെതിരെയാണ്​ നടപടി. ഇയാളെ ബ്രാഞ്ചിലേക്ക്​​ തരംതാഴ്ത്തി​.

ജില്ല സെക്രട്ടറി ആർ. നാസറിന്‍റെ സാന്നിധ്യത്തിൽ ചേർന്ന സൗത്ത് ഏരിയ കമ്മിറ്റിയിലാണ്​ തീരുമാനം. പാർട്ടി പുറത്താക്കിയ എ.പി. സോണക്കെതിരെ പരാതി​ നൽകിയവരെയും അവരുടെ കുടുംബാംഗങ്ങളെയും ഭീഷണിപ്പെടുത്തി​യെന്ന ആരോപണത്തിൽ പാർട്ടി നോട്ടീസ്​ നൽകിയിരുന്നു. ഇതുസംബന്ധിച്ച്​ നൽകിയ വിശദീകരണം തൃപ്തികരമല്ലാത്ത സാഹചര്യത്തിലാണ്​ തരംതാഴ്ത്തൽ.

സോണയെ പിന്തുണച്ച്​ ജയൻ ഫേസ്​ബുക്ക്​ പോസ്റ്റിട്ടതും വിവാദമായിരുന്നു. ‘‘ആരൊക്കെ കല്ലെറിഞ്ഞാലും ഞാനുണ്ടടാ..കൂടെ തോൽക്കാനായാലും ജയിക്കാനായാലും’’എന്നായിരുന്നു പോസ്​റ്റ്​.

കഴിഞ്ഞതവണ എൽ.സിയിൽനിന്ന്​ ഒഴിവാക്കപ്പെട്ട ഡി.വൈ.എഫ്​.ഐ നേതാവുകൂടിയായിരുന്ന ജയൻ ഏരിയ കമ്മിറ്റിയിലേക്ക്​ മത്സരിച്ചാണ്​ ജയിച്ചത്​. പാർട്ടി പ്രവർത്തകരുടേതടക്കം നിരവധി സ്ത്രീകളുടെ നഗ്​നദൃശ്യം പകർത്തിയ സംഭവം നിസ്സാരമല്ലെന്ന്​ കണ്ട്​ സംസ്ഥാന നേതൃത്വം ഇടപെട്ടതോടെയാണ്​ ജില്ലാ നേതൃത്വം നടപടി വേഗത്തിലാക്കിയത്​.