ബ്യൂട്ടിപാർലർ ജീവനക്കാരിയെ വെട്ടിക്കൊലപ്പെടുത്താൻ ശ്രമം; ഒരു വർഷത്തിനുശേഷം പ്രതി പിടിയിൽ

കൊച്ചി: ബ്യൂട്ടിപാർലർ ജീവനക്കാരിയായ യുവതിയെ വെട്ടിക്കൊലപ്പെടുത്താൻ ശ്രമിച്ചശേഷം നാടുവിട്ട പ്രതി ഒരു വർഷത്തിനുശേഷം പിടിയിലായി. ഉത്തരാഖണ്ഡ് സ്വദേശി ഫാറൂഖ് അലിയാണ്​ (26) എറണാകുളം നോർത്ത് പൊലീസിന്‍റെ പിടിയിലായത്.

2022 ഡിസംബർ മൂന്നിനായിരുന്നു സംഭവം. കലൂർ ആസാദ് റോഡിൽ ​െവച്ച് ബൈക്കിലെത്തിയ പ്രതി പശ്ചിമബംഗാൾ സ്വദേശിനി സന്ധ്യയെ വെട്ടുകത്തികൊണ്ട് വെട്ടിക്കൊലപ്പെടുത്താൻ ശ്രമിക്കുകയായിരുന്നു. കഴുത്തിനുനേരെ വന്ന വെട്ട് യുവതി കൈകൊണ്ട് തടുക്കുകയായിരുന്നു.

ഗുരുതര പരിക്കേറ്റ ഇവരെ പൊലീസ്​ എത്തിയാണ് ആശുപത്രിയിലേക്ക് മാറ്റിയത്. സംഭവശേഷം നാട് വിട്ട പ്രതിയെ സൈബർ സെല്ലിന്‍റെ സഹായത്തോടെ സാഹസികമായാണ് പിടികൂടിയത്. പ്രതിയുമായി അടുപ്പമുണ്ടായിരുന്ന യുവതിക്ക് മറ്റൊരാളുമായി സൗഹൃദമുണ്ടെന്ന സംശയമാണ് കൃത്യത്തിന് ഇയാളെ പ്രേരിപ്പിച്ചതെന്ന് പൊലീസ് പറഞ്ഞു. കോടതിയിൽ ഹാജരാക്കി റിമാൻഡ്​ ചെയ്തു.