അപകടത്തിൽപെട്ട കുട്ടിയുടെ മരണം: വഴിയിൽ ഇറക്കിവിട്ട കാർ ഡ്രൈവർ റിമാൻഡിൽ

ചിറ്റൂർ: കാറിടിച്ച് ഗുരുതരമായി പരിക്കേറ്റ 12 വയസ്സുകാരനെ വഴിയിലിറക്കി വിട്ട് കാർ യാത്രികരുടെ ​െകാടും ക്രൂരത. യഥാസമയം ചികിത്സ കിട്ടാതെ കുട്ടി മരിച്ച സംഭവത്തിൽ കാർ ഡ്രൈവറെ പാലക്കാട്​ കസബ പൊലീസ്​ അറസ്​റ്റ്​ ചെയ്​തു. മലപ്പുറം പുത്തനത്താണി പിലാക്കൽ അബ്​ദുൽ നാസറാണ്​ (34)​ അറസ്​റ്റിലായത്​. ഇയാളെ പാലക്കാട്​ ജുഡീഷ്യൽ ഫസ്​റ്റ്​ ക്ലാസ്​ മജിസ്​ട്രേറ്റ്​ കോടതി-ഒന്ന്​ 14 ദിവസത്തേക്ക്​ റിമാൻഡ്​ ചെയ്​തു.

വ്യാഴാഴ്ച വൈകീട്ട് നാലോടെയാണ്​ മനഃസാക്ഷിയെ ഞെട്ടിച്ച സംഭവം നടന്നത്​. നല്ലേപ്പിള്ളി കുറുമന്ദാംപള്ളം സുദേവ​​െൻറ മകൻ സുജിത്താണ്​ (12) മരിച്ചത്. കൈതക്കുഴിക്ക്​ സമീപം റോഡരികിൽ നിൽക്കുകയായിരുന്ന സുജിത്തിനെ പൊള്ളാച്ചി ഭാഗത്തുനിന്ന് അമിതവേഗതയിലെത്തിയ കാർ ഇടിച്ചുതെറിപ്പിക്കുകയായിരുന്നു. തലക്ക്​ സാരമായ പരിക്കേറ്റ കുട്ടിയെ നാട്ടുകാർ ആവശ്യപ്പെട്ട പ്രകാരം ഇടിച്ച വാഹനത്തിലാണ്​ കൊണ്ടുപോയത്​.

അയൽവാസിയായ പരമനും കൂടെയുണ്ടായിരുന്നു. സമീപമുള്ള നാട്ടുകല്ലിലെ ആശുപത്രിയിലെത്തിക്കാൻ ആവശ്യപ്പെ​െട്ടങ്കിലും കാറിലുള്ളവർ പാലക്കാട്​ ഭാഗത്തേക്കാണ്​ വാഹനം വിട്ടത്​. ഒരുകിലോമീറ്റർ പിന്നിട്ടപ്പോൾ ടയർ പഞ്ചറായെന്ന്​ പറഞ്ഞ്​ കുട്ടിയേയും കൂടെ വന്നയാളെയും വഴിയിൽ ഇറക്കി കാറിലുള്ളവർ സ്ഥലംവിട്ടു. കുട്ടിയുടെ നില ഗുരുതരമായതിനാൽ ഉടൻ തന്നെ എതിരെവന്ന വാനിന്​ കൈകാണിച്ചുനിർത്തി കൊഴിഞ്ഞാമ്പാറയിലെ സ്വകാര്യ ആശുപത്രിയിലെത്തിച്ചുവെന്ന് പരമൻ പറയുന്നു. അപ്പോഴേക്കും കുട്ടി മരിച്ചു. കാറിൽ നാലുപേരാണ്​ ഉണ്ടായിരുന്നത്​. കാർ വെള്ളിയാഴ്​ച രാവിലെ കസബ പൊലീസ്​ കസ്​റ്റഡിയിലെടുത്തു. ടയർ പഞ്ചറായിരുന്നില്ലെന്ന്​​ പൊലീസ്​ വെളിപ്പെടുത്തി. ​

െഎ.പി.സി 304 സെക്​ഷൻ പ്രകാരം നരഹത്യക്കാണ്​ ഡ്രൈവർക്കെതിരെ കേസ്​​​. അപ്പുപിള്ളയൂർ എ.യു.പി സ്കൂളിലെ ഏഴാം ക്ലാസ് വിദ്യാർഥിയായ സുജിത്ത് ക്ലാസ്​ കഴിഞ്ഞശേഷം ഇരട്ടക്കുളത്തെ തറവാട്ടിൽ മുത്തച്ഛ​​െൻറ ചരമവാർഷിക ചടങ്ങുമായി ബന്ധപ്പെട്ട്​ എത്തിതായിരുന്നു. ബാഗ്​ വീട്ടിൽവെച്ച ശേഷം സമീപത്ത്​ കളിക്കുകയായിരുന്ന കൂട്ടുകാരുടെ അടുത്തേക്ക്​ പോകാൻ റോഡരികിൽ നിൽക്ക​ു​​േമ്പാഴാണ്​ അപകടം​. മൃതദേഹം ജില്ല ആശുപത്രിയിലെ പോസ്​റ്റ്​മോർട്ടത്തിനുശേഷം ബന്ധുക്കൾക്ക് വിട്ടുകൊടുത്തു. മാതാവ്​: രാധ, സഹോദരൻ: സൂരജ്.